«Դուք ընտրել եք քաղաքական միտքը, քաղաքական խոսքը, պառլամենտարիզմի հույսը, ԱԺ-ում փոփոխություններ ու հակակշիռներ ունենալու ճանապարհը»,-դիմելով իրենց ընտրողներին՝ հայտարարել է «Լուսավոր Հայաստան» կուսակցության ղեկավար Էդմոն Մարուքյանը։
Նրա խոսքով՝ ընտրական գործընթացը տեղի է ունեցել անհավասար պայմաններում․ «Այդ հակաքարոզչությամբ և ռեսուրսների այս անհամաչափ ներդրմամբ եղել է անհամաչափ ընտրական պայքար։ Հ1-ով ամեն թեկնածու երկու եթեր գոնե ստանում էր, բայց մեզ համար դաշտը եղել է անհավասար»։
Մարուքյանը պնդել է, որ ներկա քաղաքական համակարգը հեռու է իրական մրցակցությունից․ «Մեր ժողովուրդը մեծ հաշվով քվեարկել է քաղաքական անապատի համար, որովհետև այն, ինչ տեղի է ունեցել, քաղաքական անապատ է»։
Խոսելով խորհրդարանի հնարավոր աշխատանքի մասին՝ Մարուքյանը նշել է, որ խորհրդարանը չի կարող լուծումներ առաջարկել երկրի առաջ ծառացած հիմնարար խնդիրների համար, իշխանությունը պահպանելու է վերահսկողությունը նաև խորհրդարանում․ «Նիկոլ Փաշինյանին ոչ մի բան չի կանգնացնելու»։
Միաժամանակ նա ընդգծել է, որ իր քաղաքական թիմը չի հեռանում քաղաքականությունից․ «Մենք ձեզ խոսք ենք տվել, որ անկախ ընտրությունների արդյունքներից մնալու ենք քաղաքականության մեջ»։
Անդրադառնալով առաջիկա անելիքներին, Մարուքյանն ասել է՝ թիմը թեև հոգնած է, բայց պատրաստ է վերականգնվել և շարունակել աշխատանքը․ «Մենք մեզ շատ լավ ենք զգում, ուղղակի շատ հոգնած ենք քարոզարշավից, կվերականգնվենք»։
