Եվրամիությունը շնորհավորել է Հայաստանի քաղաքացիներին խորհրդարանական ընտրությունների կապակցությամբ և բարձր գնահատել քաղաքացիական ակտիվ մասնակցությունը։
ԵՄ անունից արված հայտարարության մեջ նշվում է, որ քվեարկությունն ի ցույց է դնում Հայաստանի հավատարմությունը ժողովրդավարությանը, խաղաղությանը և Եվրոպայի հետ սերտ կապերին։ Ըստ ԵԱՀԿ/ԺՀՄԻԳ դիտորդական առաքելության նախնական եզրակացության՝ չնայած բևեռացված քարոզարշավին, ընտրությունները կազմակերպվել են ներառական և հստակ քաղաքական այլընտրանքներ են առաջարկել։
Հայտարարության համաձայն՝ ընտրական գործընթացն անցել է Ռուսաստանի կողմից աննախադեպ միջամտության, ճնշումների և հիբրիդային հարձակումների, այդ թվում՝ տնտեսական հարկադրանքի միջոցների ներքո, որոնք նպատակ են ունեցել խաթարել ժողովրդավարական գործընթացը։ Այդուհանդերձ, ըստ ԵՄ-ի, արդյունքներն արտացոլում են Հայաստանի ժողովրդավարական դիմակայունությունը։
«ԵՄ-ն հաշվի է առնում Հայաստանի ընտրական մարմինների կողմից հրապարակված նախնական արդյունքները, որոնք ցույց են տալիս վարչապետ Նիկոլ Փաշինյանի «Քաղաքացիական պայմանագիր» կուսակցության հստակ առավելությունը: Մենք կոչ ենք անում բոլոր քաղաքական դերակատարներին հարգել քվեարկության արդյունքները, ժողովրդավարական ընթացակարգերը և օգտագործել իրավական մեխանիզմները՝ ընտրական ցանկացած բողոք քննարկելու համար»,- ասվում է հայտարարության մեջ։
Եվրամիությունը հաշվի է առել նախնական արդյունքները, որոնցով վարչապետ Նիկոլ Փաշինյանի «Քաղաքացիական պայմանագիր» կուսակցությունը հստակ առաջատար է, և բոլոր քաղաքական ուժերին կոչ է արել հարգել քվեարկության արդյունքները։ ԵՄ-ն վերահաստատել է իր հաստատակամ աջակցությունը Հայաստանին՝ ժողովրդավարական ուղու, բարեփոխումների իրականացման և տարածաշրջանային խաղաղության խթանման գործում։
