ԵՄ խորհուրդը Կոսմին Ջորջ Դինեսկուին նշանակել է Հայաստանում ԵՄ նորաստեղծ Գործընկերության առաքելության (EUPM Armenia) ղեկավար, որի մեկամյա մանդատը կմեկնարկի 2026 թվականի հունիսի 11-ից։
Առաքելությունը ստեղծվել է հայկական կողմի խնդրանքով՝ 2026 թվականի ապրիլի 26-ին՝ նախնական երկու տարի ժամկետով, և նպատակ ունի բարձրացնել երկրի դիմակայունությունն ու ճգնաժամային կառավարման կարողությունները։
Այն ռազմավարական և օպերատիվ խորհրդատվության միջոցով կաջակցի Հայաստանին այնպիսի բազմաշերտ սպառնալիքների դեմ պայքարում, ինչպիսիք են կիբերհարձակումները, օտարերկրյա տեղեկատվական մանիպուլյացիաներն ու միջամտությունները, ինչպես նաև ապօրինի ֆինանսական հոսքերը։
Առաքելության նորանշանակ ղեկավար Կոսմին Դինեսկուն ռումինացի դիվանագետ է, որն ունի միջազգային հարաբերությունների ոլորտում ավելի քան 25 տարվա փորձ և նախկինում ղեկավարել է Մոլդովայում ԵՄ համանման գործընկերության առաքելությունը։
Նշվում է նաև, որ սա Հայաստանում ԵՄ երկրորդ քաղաքացիական առաքելությունն է, որը լիովին անջատ է 2023 թվականին ստեղծված ԵՄ դիտորդական առաքելությունից (EUMA)։ Վերջինիս նպատակը տեղում իրավիճակի դիտարկումն ու հակամարտությունից տուժած շրջաններում վստահության ամրապնդումն է։
