Արդարադատության նախարար Սրբուհի Գալյանը ճեպազրույցում ասել է, որ երեկ քննարկվել է Սահմանադրության տեքստը հրապարակելու հարցը։
«Առաջիկայում ամբողջացնելուց հետո, որովհետև սպասում ենք մեր որոշ գործընկերների կողմից ուղարկվելիք կարծիքներին։ Մեզ մեկ կամ երկու շաբաթ պետք կգա, որպեսզի այդ կարծիքները հավաքենք, ամբողջացնենք, ևս մեկ կամ երկու քննարկում կունենանք և կորոշենք՝ պատրաստ ենք հրապարակել, թե ոչ», – շեշտել է Գալյանը։
Իսկ թե ինչու չեն հրապարակում, նա պատասխանել է. «Ես բազմաթիվ անգամ առիթ եմ ունեցել այս մասին խոսելու, ասել եմ, որ տեքստը պատրաստ չէ, քանի որ մեր մի շարք գործընկերներ չեն հասցրել ուղղակի դիտարկումներ ներկայացնել, և սա միանձնյա որոշում չէ՝ հրապարակել կամ չհրապարակելը: Որոշել ենք չհրապարակել՝ չենք հրապարակել, կորոշենք հրապարակել՝ կհրապարակենք», – նշել է նախարարը:
Նրա խոսքով՝ այսօր իշխանությունը չունի սահմանադրական մեծամասնություն. «Մենք ասել ենք, որ մեր օրակարգում հեղափոխությունից հետո եղել է Սահմանադրությունը փոփոխելը, դա եղել է քաղաքական հանձնառություն, ինչը մենք ստանձնել ենք և պատրաստ ենք ի կատար ածել: Նոր Սահմանադրության տեքստը հրապարակելը և հանրության հետ քննարկելը մեր հանձնառության մի մասն են, թե ինչ կլինի դրանից հետո՝ ժամանակը ցույց կտա», – շեշտել է նախարարը։
