«Այս պահի դրությամբ տրամադրվել է ավելի քան 21 մլրդ դրամի վարկ, մոտ 14 հազար շահառուների»,-ԱԺ-ում հայտարարեց էկոնոմիկայի նախարար Գևորգ Պապոյանը՝ անդրադառնալով ֆերմերների վարկերի սուբսիդավորման ծրագրին։
Նա նշեց, որ կառավարության նախորդ նիստում էլ ընդունվել է որոշում, որով պետական բյուջեից սուբսիդավորվում է ջերմոցային արտադրանքի մաքսատուրքը և փոխադրման արժեքի մի զգալի մասը։
«Դրա արդյունքում արդեն իսկ ունենք արտահանում Վրաստան, Հունաստան, Ուկրաինա, Ղազախստան, այլ երկրներ և այս պրոցեսը շարունակական է։ Մենք ակնկալում ենք շատ ավելի մեծ ծավալներ։ Այստեղ սահմանափակում չկա, ինչքան շատ արտահանեն, մենք այդ ամբողջ ծավալը կսուբսիդավորենք, և ուրախությամբ պետք է արձանագրեմ, որ ամեն հաջորդ օրը ծավալները շարունակաբար մեծանում են»,-հայտարարեց Պապոյանը։
Նա հավելեց, որ կառավարության այսօրվա նիստում էլ որոշում կընդունվի, որ ջերմոցային արտադրանքի արտահանման տրանսպորտային ծախսերի և մաքսատուրքի 8.5 % և 14.5%-ը։
«Որակական առումով մեր ապրանքների զգալի մասը չեն զիջում եվրոպական շուկաների ապրանքներին, որովհետև այն ինտենսիվ այգիները, որոնք որ կան ՀՀ-ում, դրանք բացարձակապես նույնական են Հունաստանի, Իտալիայի, Իսպանիայի, Ֆրանսիայի ինտենսիվ այգիների հետ։ Այն ջերմոցային տնտեսությունները որոնք կան Հայաստանում բացարձակապես նույնական են՝ որ մի տեխնոլոգիայի տարբերություն չկա, ինչը որ կա Իտալիայում, ֆրանսիայում, Գերմանիայում և ստացված արտադրանը համապատասխանում է ամենաբարձր ստանդարտներին»,- հայտնեց էկենոմիկայի նախարարը։
Այստեղ խնդիրն այն է, որ Հայստանը ունի աշխարհագրական հեռավորություն ԵՄ-ի շուկայից և դրա պատճառով որոշակի տեխնիկական խնդիրներ առաջանում են։
«Հայաստանի ապրանքն ամենաբարձր որակի է, համապատասխանում է բոլոր ստանդարտներին, մեր միակ խնդիրն այն է, որ մենք որոշակի հեռավորություն ունենք այդ շուկաներից, մեր տրանսպորտային ծախսերը ավելի մեծ են»,-հայտարարեց էկոնոմիկայի նախարարը՝ շմոռանալով ընդունել որ հայկական գյուղատնտեսական արտադրողներն այսօր ունեն արտահանման բազմաթիվ խնդիրներ։
