ԱՄՆ նախագահ Դոնալդ Թրամփը հայտարարել է Իրանի հետ համաձայնագրի կնքման պատրաստակամության մասին, որը նպատակ ունի լիցքաթափել տարածաշրջանային լարվածությունը և կարգավորել միջուկային հիմնախնդիրը։
Axios-ի տվյալներով՝ այսպես կոչված «Իսլամաբադի համաձայնագրի» նախնական տարբերակը նախատեսում է Հորմուզի նեղուցի անհապաղ բացում՝ առանց տուրքերի, ի պատասխան որի ԱՄՆ-ն պետք է վերացնի ծովային շրջափակումը։
Համաձայնագիրը նախատեսում է 60-օրյա հրադադար, այդ թվում՝ Լիբանանում, որի ընթացքում կողմերը պետք է շարունակեն բանակցությունները միջուկային ծրագրի շուրջ։ Իրանը պարտավորվում է երբեք միջուկային զենք ձեռք չբերել և լուծել հարստացված ուրանի պաշարների հետ կապված հարցը, սակայն, ըստ միջնորդ երկրներից մեկի դիվանագետի, Իրանի միջուկային ծրագրի վերաբերյալ կոնկրետ գործողությունները կախված կլինեն երկրորդ՝ ավելի մանրամասն համաձայնագրի կնքումից։
Գործարքի շրջանակներում նախատեսվում է Իրանին տրամադրել պատժամիջոցների մեղմացում, մասնավորապես՝ նավթի վաճառքի համար ժամանակավոր թույլտվություններ, սակայն այդ գործընթացը կախված կլինի Իրանի կողմից պայմանավորվածությունների կատարումից և բանակցություններում բարեխղճության դրսևորումից։
Թեև ԱՄՆ-ն և Իրանը, ըստ երկու դիվանագետի և երկու ամերիկացի պաշտոնյայի, համաձայնեցրել են տեքստը, այն դեռևս վերջնական հաստատման կարիք ունի Իրանի բարձրագույն ղեկավարության կողմից։
Միաժամանակ շարունակվում են քննարկումները Իրանի արտերկրում սառեցված ֆինանսական միջոցների հասանելիության շուրջ, որոնք, ըստ ԱՄՆ պաշտոնյաների, պետք է օգտագործվեն բացառապես հումանիտար ապրանքներ ձեռք բերելու համար՝ պայմանների կատարմանը համապատասխան։
