«Մենք էլ չենք հաղթել, Նիկոլ Փաշինյանն էլ չի հաղթել։ Հիշում եք, որ Հայաստանին պետք է լեգիտիմ իշխանություն, ինքը չապահովեց։ Հիմա ինքը թոզ փչած իշխանություն է»,-դատարանի բակում լրագրողների հետ զրույցում ասել է «Ուժեղ Հայաստան» դաշինիքի վարչապետի թեկնածու, գործարար, բարերար Սամվել Կարապետյանը՝ խոսելով ընտրությունների արդյունքների մասին։
Նրա գնահատմամբ, ընտրություններն ամբողջությամբ տապալված են, կեղծված, անցել են ճնշումների ու ահաբեկումների մթնոլորտում։
«Տեռորի տակ ընտրություններ չեն անցկացվում, մեր շրջանային բոլոր համակարգողները կալանավորված են։ 780 մարդ ձերբակալվել է»,-ասաց Կարապետյանը։
Նա նշեց՝ «Ուժեղ Հայաստան» դաշինքն արդեն դիմել է ԿԸՀ, շուտով կդիմի նաև Սահմանադրական դատարան։
«Դիմել ենք երկու պահանջով՝ չեղարկել ընտրությունները և նշանակել երկրորդ փուլ։ Եթե նա վստահ է, որ հաղթել է, ավելի ճիշտ կլինի, որ երկորրդ փուլ անցկացվի»,-ասաց Կարապետյանը։
Խորհրդարան գնալ-չգնալու հարցին ի պատասխան՝ Կարապետյանը հայտարարեց, խոսքը դրա մասին չէ. «Դրա մասին խոսելու համար դեռ շատ շուտ է։ Մեր հարցը խորհրդարան գնալ-չգնալու մասին չէ, մեր հարցը Փաշինյանին հեռացնելն է, երկիրը դարձրել է դուքյան։ Ինչ ուզում են՝ անում են։ Եթե մենք գտնում ենք, որ խորհրդարանով ավելի արագ կարող ենք հեռացնել Փաշինյանին, կգնանք խորհրդարան, եթե գտնում ենք, որ կարող ենք հեռացնել փողոցային պայքարով, ուրեմն կհեռացնենք փոցողային պայքարով»։
