Հայաստանից սննդամթերքի մատակարարման բազմաթիվ արգելքները, որոնք սահմանվել են վերջին ամսում, կապված չեն քաղաքականության հետ. հայտարարել է «Ռոսսելխոզնադզոր»-ի ղեկավար Սերգեյ Դանկվերտը:
Նրա գնահատմամբ՝ Երևանի և Մոսկվայի միջև հարաբերությունների միաժամանակյա վատթարացումը ոչ ավելին է, քան զուտ պատահականություն։
«Մենք ձեռնարկությունների հետ աշխատանքի բազմամյա պատմություն ունենք, լաբորատոր հետազոտությունների արդյունքներ, մատակարարումների և հայտնաբերված խախտումների վերաբերյալ տվյալներ»,- ասել է նա։
Որպես հիմնական խնդիր Դանկվերտը նշել է հանրապետությունում արտադրության և վերահսկողության կազմակերպումը, ավելի ստույգ՝ դրա բացակայությունը բուն արտադրանքի աճեցման և առաքման միջև ընկած ժամանակահատվածում։
Արտահանման մատակարարումներով զբաղվում են մեծ թվով ֆերմերներ, այնպես որ, օրինակ, տարբեր մատակարարների հազարավոր կապ կանաչին հավաքվում են մեկ մեքենայի մեջ, և միայն դրանից հետո այն գնում է ստուգման: Այսպիսով, վերահսկողությունը սկսվում է ոչ թե արտադրության ընթացքում, այլ արդեն սահմանին, սակայն նման ձևաչափով այն արդյունավետորեն իրականացնելն անհնար է։
«Ռոսսելխոզնադզոր»-ի ղեկավարը վստահեցրել է, որ արգելքի մասին որոշումները չեն ընդունվում տարերայնորեն (սպոնտան), և յուրաքանչյուր ձեռնարկության պատմությունը ձգվում է տարիներ ի վեր: Թե ինչ պատճառով հայկական ձեռնարկությունների նկատմամբ նման լուրջ խախտումների դեպքում միջոցներ չեն ձեռնարկվել ավելի վաղ, իսկ վտանգավոր արտադրանքը մատակարարվել է երկիր, պաշտոնյան չի հստակեցրել։
