Վարչապետ Նիկոլ Փաշինյանը հայտարարել է, որ, մոնիտորինգի համաձայն, Հայաստանի տնտեսությունը ադապտացիայի (հարմարեցման) բավականին լավ տեմպեր է ցույց տալիս։
«Եվ մենք ուզում ենք այս և նմանատիպ ծրագրերով այդ ադապտացիան քաջալերել։ Կառավարությունը շահառուներին ասում է հետևյալը. «Հարգելի՛ տնտեսվարողներ, առաջիկա 6 ամիսների ընթացքում դուք կարող եք չմտահոգվել, գնացե՛ք, հանգիստ ուսումնասիրեք այն նոր շուկաների հնարավորությունները, որ մենք ձեզ համար բացել ենք», – ասել է նա և հավելել, որ սա լավ ու փայլուն հնարավորություն է տնտեսվարողների համար։
Նրա խոսքով՝ կառավարությունը պատրաստ է հասցեական աջակցություն ցուցաբերել բոլոր այն դեպքերում, երբ կարձանագրվի, որ մարդիկ հանդիպել են օբյեկտիվ խոչընդոտի. «Ի՞նչ նկատի ունեմ օբյեկտիվ խոչընդոտ ասելով․ երբ ապրանքը, արտադրանքը համապատասխանում է ստանդարտին, բայց այդ պայմաններում ունի որոշակի խնդիրներ։ Այն ապրանքների դեպքում, որոնք ստանդարտին չեն համապատասխանում, մենք այնտեղ շատ աջակցելու բան չենք տեսնում», ասել է վարչապետը։
Կառավարության ղեկավարը շեշտել է, որ նրանց համար, ովքեր կցանկանան համապատասխանել այդ ստանդարտներին, աջակցության ծրագրերն այսօր էլ բաց են. «Եթե պարզվի, որ կա աջակցության ինչ-որ ծրագիր, որը մենք չենք նախատեսել, դա էլ կընդունենք, բայց, կներեք, անորակ ապրանք արտահանել ինքնիշխանության հաշվին՝ անտրամաբանական է»,- շեշտել է Նիկոլ Փաշինյանը։
