Հրապարակվել է Գագիկ Ծառուկյանի մասին The Guardian-ի հոդվածը՝ «Հայ մեծահարուստն ունի մասնավոր գազանանոց. այժմ ցանկանում է Հիսուսի՝ աշխարհի ամենամեծ արձանը» վերնագրով։ Հոդվածը հիմնականում վերաբերում է Հիսուսի արձանի պրոյեկտին։ Միաժամանակ նշվում է, որ Ծառուկյանն իր դիրքին հասել է նախկին նախագահ Ռոբերտ Քոչարյանի հետ մտերմությամբ։ The Guardian-ը հրապարակել է նաև կադրեր Ծառուկյանի գազանանոցից, ինչպես նաև նրա որսի «հաղթանշաններից»։
Ստորև ներկայացնում ենք հոդվածի առանցքային շեշտադրումները.
Մասնավոր կենդանաբանական այգին և ցուցադրական հարստությունը
Բրիտանական պարբերականն իր հոդվածը սկսում է Երևանի ծայրամասում գտնվող Ծառուկյանի ընդարձակ կալվածքի նկարագրությամբ՝ այն համարելով Հայաստանի ամենաէքսցենտրիկ գործարարի ճաշակի և ցուցադրական հարստության վառ օրինակ։ The Guardian-ի լրագրողն առանձնացնում է գործարարի մասնավոր կենդանաբանական այգին, որտեղ ցանկապատերի ու վանդակների հետևում պահվում են վեց վագր, երեք առյուծ և ալիգատորներ։
Հոդվածագիրը հատուկ անդրադառնում է նաև կալվածքի ճաշասենյակում ցուցադրված խրտվիլակների հարուստ հավաքածուին՝ հետևի թաթերի վրա կանգնած սպիտակ վագրեր, արծիվ, հատակին փռված արջի և գայլի մորթիներ։ Պարբերականը փաստում է, որ, ինչպես հպարտությամբ նշել է սեփականատերը, այդ բոլոր կենդանիներին անձամբ ինքն է խփել։ Ըստ հրապարակման՝ Ծառուկյանի հարստության նմանօրինակ ցուցադրությունները վաղուց դարձել են տեղական բանահյուսության առարկա։
Հիսուսի արձանը՝ որպես Հայաստանի «նոր բրենդ»
Անդրադառնալով Երևանին նայող 2500 մետր բարձրությամբ լեռան գագաթին կառուցվող արձանին՝ The Guardian-ը նշում է, որ 101 մետր բարձրությամբ հուշարձանը տեսանելի է լինելու մայրաքաղաքի մեծ մասից։ Ծառուկյանը պարբերականին տված հարցազրույցում նշել է. «Սա լինելու է Հայաստանի այցեքարտը։ Քրիստոնեությունը կդառնա Հայաստանի նոր բրենդը»։ Նա նաև վստահություն է հայտնել, որ տարեկան 10 միլիոն զբոսաշրջիկ կայցելի այդ վայր:
Պարբերականը, սակայն, ընդգծում է նախագծի շուրջ առկա հակասությունները.
Եկեղեցու դիրքորոշումը. Հայ Առաքելական եկեղեցին դեմ է արտահայտվել նախագծին՝ պնդելով, որ դրա մասշտաբներն ու ոճը չեն համապատասխանում Հայաստանի կրոնական և ճարտարապետական ավանդույթներին (վանքեր, եկեղեցիներ և խաչքարեր):
Բնապահպանների ահազանգը. Ակտիվիստները նախազգուշացնում են, որ շինարարությունը կարող է տևական վնաս հասցնել Հատիսի բնական լանդշաֆտին։ Ծառուկյանն անտեսել է այս առարկությունները՝ պնդելով, որ նախագիծը չափազանց նշանակալից է դարձել այն լքելու համար:
Բացի այդ, Ծառուկյանը հայտնել է, որ մոտակայքում արդեն սկսվել է ևս մեկ մեգանախագծի՝ 134 մետր երկարությամբ հսկայական Նոյյան տապանի շինարարությունը։
Քաղաքական անկում և հարկային մեղադրանքներ
Վերլուծելով Ծառուկյանի քաղաքական դիրքերը՝ հոդվածագիրն արձանագրում է, որ երկու տասնամյակ շարունակ Հայաստանի ամենաազդեցիկ դեմքերից մեկը համարվող գործչի դիրքերն անկում են ապրում: Վերջին խորհրդարանական ընտրություններում նրա գլխավորած կուսակցությունը հավաքել է անցողիկ շեմից պակաս՝ 4%-ից ցածր ձայն (արդյունքը վիճարկվում է դատարանում)։
The Guardian-ը հիշեցնում է վարչապետ Նիկոլ Փաշինյանի և Ծառուկյանի միջև առկա կոնֆլիկտի մասին։ Նշվում է, որ Փաշինյանը բազմիցս ներկայացրել է Ծառուկյանին որպես կոռումպացված հին կարգերի խորհրդանիշ։ Պարբերականը շեշտում է հունիսի 7-ի ընտրություններից հետո տեղի ունեցած զարգացումները. Փաշինյանի ելույթից անմիջապես հետո քննիչները ժամանել են Ծառուկյանի կալվածք՝ հարկային իրավախախտումների մեղադրանք առաջադրելու համար։
Անդրադառնալով երկրից փախչելու փորձի մասին տեղական մամուլի հրապարակումներին՝ Ծառուկյանը The Guardian-ին հայտնել է, որ մեղադրանքներն անհիմն են, և ինքը պարզապես կարճ ուղևորություն էր ծրագրել դեպի ԱՄԷ, սակայն իրեն թույլ չեն տվել մեկնել, որից հետո վերադարձել է տուն։ Ծառուկյանը վստահեցրել է, որ քրեական գործերը չեն կարող խափանել իր շինարարական ծրագրերը։
