Այսօրվա դրությամբ Երևանը գտնվում է իր զարգացման ուղու ընտրության գործընթացում, ինչը կարևոր է Մոսկվայի համար, քանի որ Ռուսաստանը և Հայաստանը եղբայրական երկրներ են։ Այս մասին, ըստ «ՏԱՍՍ»-ի թղթակցի, հայտարարել է Ռուսաստանի նախագահի մամուլի քարտուղար Դմիտրի Պեսկովը։
«Մենք տեսնում ենք, որ Հայաստանը և նրա ղեկավարությունն այժմ գտնվում են խաչմերուկում։ Հայաստանի ղեկավարությունը խոսում է զարգացման ուղու առաջիկա ընտրության մասին։ Սա կարևոր է մեզ համար, քանի որ դարեր շարունակ Ռուսաստանը և Հայաստանը հարևաններ են եղել, եղբայրական երկրներ»,- ասել է Կրեմլի խոսնակը։
Ըստ նրա՝ Մոսկվային և Երևանին միավորում է լավ ինտեգրացիան, որը նպաստում է Հայաստանի ՀՆԱ-ի աճին, և ԵԱՏՄ-ն Հայաստանի լավագույն ընտրությունն է ինտեգրացիոն միավորումների շարքում։
Պեսկովը շեշտել է նաև, որ Ռուսաստանի և Հայաստանի միջև հարաբերությունները կզարգանան։
«Մենք կկարգավորենք մեր հարաբերությունները Հայաստանի հետ, մենք շատ ընդհանրություններ ունենք։ Մենք լուրջ ներդրող ենք Հայաստանում, ուստի շատ բան կա անելու, և հարաբերությունները կշարունակեն զարգանալ»,- լրագրողներին ասել է Պեսկովը։
