Հայաստանում հունիսի 7-ի ընտրությունները չեն եղել ազատ և հավասար։ Այս պնդումները հիմնավորելու համար ելակետ ենք ընդունում 2026թ․ փետրվարի 7-ից մինչև հունիսի 7-ն ընկած ժամանակահատվածը, այնուհետև հունիսի 7-ից մինչև հունիսի 14-ն ընկած ժամանակահատվածը։ Այս մասին հրավիրված ասուլիսում ասաց «Ուժեղ Հայաստան» դաշինքի ներկայացուցիչ Արամ Վարդևանյանը։
«ՀՀ-ում ձևավորվում է կուսակցապետություն, երբ կուսակցության գործունեությունը և գործադիր իշխանության գործունեությունը միախառնվում են։ Ստեղծված իրավիճակի տեսանկյունից առաջին փաստական տվյալը, որ կցանկանայի վկայակոչել կենսաթոշակի բարձրացումն է»,- ասաց Վարդևանյանը՝ նշելով, որ ակնհայտ է, որ ՀՀ-ում սոցիալական բնույթի խնդիրներ առկա են, 10 հազար դրամով կենսաթոշակի բարձրացումը սպասելի էր, բայց այն ոչ թե տեղի է ունենում 2022թ․, 2023 կամ 2024թ, այլ՝ 2026թ․ մարտ-ապրիլ ամիսներին։ Բացի այդ, Վարդևանյանը հիշեցրեց ապրիլի 7-ին Ընտրական օրենսգրքում փոփոխությունը, որով արգելվել էր ընտրությունների գործընթացում անձնանունի օգտագործումը՝ որպես դաշինքի անվանում, դա, ինչպես նկատում է Վարդևանյանը, իրականացվել է հենց «Ուժեղ Հայաստան» դաշինքի դեմ։
Միևնույն ժամանակ փոփոխություն էր կատարվել՝ անվավեր քվեաթերթիկների պահանջների վերաբերյալ, ինչի ուղիղ պատճառահետևանքային կապն արձանագրվել է այս ընտրությունների արդյունքներով։ Վարդևանյանի խոսքով՝ վերջին տարիների ընթացքում առաջին անգամ ՀՀ-ում 16 հազարից ավել քվեաթերթիկ եղել է անվավեր։
