Ռուսաստանը դադարեցնում է ձկնամթերքի ներկրումը Հայաստանից՝ արգելքը տարածելով հանրապետության բոլոր ձեռնարկությունների վրա։ «ՏԱՍՍ» գործակալության փոխանցմամբ՝ Ռոսսելխոզնադզորը նման որոշում է կայացրել՝ պատճառաբանելով, որ հայկական կողմը չի վերացրել նախկինում հայտնաբերված խախտումները։
Ավելի վաղ ռուսական վերահսկող մարմինը հորդորել էր հայկական կողմին ժամանակավորապես դադարեցնել ամբողջ ձկնամթերքի սերտիֆիկացումը՝ բացառությամբ այն ընկերությունների, որոնք անմիջականորեն մասնակցել էին ստուգումներին։
Մասնավորապես, «ՄՖ Էքսպորտ» և «Ինվեստ պլյուս» ընկերությունների նկատմամբ կիրառվել էր ուժեղացված լաբորատոր հսկողության ռեժիմ։ Սակայն այսօր Ռոսսելխոզնադզորը հայտարարել է, որ սահմանափակումներն ընդլայնվել են և այժմ վերաբերում են նաև այդ երկու ձեռնարկություններին, ինչը նշանակում է, որ հայկական ձկնամթերքի արտահանումը դեպի ռուսական շուկա լիովին կասեցված է։
