Ռուսաստանի ԱԳ փոխնախարար Միխայիլ Գալուզինը հայտարարել է, որ TRIPP տրանսպորտային նախագիծը կարող է արդյունավետ իրականացվել միայն Ռուսաստանի և ԵԱՏՄ-ի շահերը հաշվի առնելու դեպքում։
Գալուզինը նշել է, որ ենթակառուցվածքները պետք է համապատասխանեն ռուսական տեխնիկական ստանդարտներին, իսկ կառավարումը պետք է իրականացվի ԵԱՏՄ նորմերին համապատասխան՝ հաշվի առնելով նաև այն հանգամանքը, որ սահմանային անվտանգությունն ապահովում են ռուս սահմանապահները։
«Ավելին, հայկական երկաթուղիները կառավարվում են «Հարավկովկասյան երկաթուղիներ» ընկերության կողմից, որը «Ռուսական երկաթուղիներ»-ի դուստր ձեռնարկություն է։ Հայաստանի միջով տարանցումը, ի դեպ, Եվրասիական տնտեսական միության համատեքստում, պետք է իրականացվի ԵԱՏՄ նորմերին և կանոնակարգերին համապատասխան, որից Հայաստանը, ինչպես պնդում է, չի ցանկանում դուրս գալ», – RTVI-ին տված հարցազրույցում ասել է Գալուզինը։
Դիվանագետը նաև կասկած է հայտնել, որ Իրանն ու Չինաստանը կողջունեն տարածաշրջանում ամերիկյան վերահսկողության հաստատումը տրանսպորտային այդ ուղու նկատմամբ՝ հատկապես ներկայիս աշխարհաքաղաքական լարվածության պայմաններում։
