«Հանուն հանրապետության» կուսակցության առաջնորդ Արման Բաբաջանյանը «Ֆեյսբուք»-ի իր էջում գրել է.
Սահմանադրական դատարանում դատավոր Սեդա Սաֆարյանի թիրախավորումը վտանգավոր փորձ է՝ սահմանափակելու ՍԴ անկախ առաքելությունը՝ Սահմանադրության գերակայության, ժողովրդավարության և ազատ ընտրության իրավունքի պաշտպանությունը։
Սահմանադրական դատարանի դատավորը պարտավոր չէ հարմար լինել քաղաքական ուժերին։ Նա պարտավոր է անհարմար լինել Սահմանադրության խախտումների, ժողովրդավարության դեմ գործող ուժերի, ընտրակաշառքով ստացված քվեների, ապօրինի ներմուծված ընտրական ռեսուրսների և Հայաստանի քաղաքացիների ազատ կամքը խեղաթյուրելու բոլոր փորձերի նկատմամբ։
Իրավական պետությունում դատավորի անկախությունը չափվում է սկզբունքային համարձակությամբ՝ բարձրացնելու այն հարցերը, որոնք վճռորոշ են իրավունքի, ժողովրդավարության և հանրային իշխանության սահմանադրական աղբյուրի՝ ժողովրդի ազատ կամքի պաշտպանության համար։
Հենց այդ պատճառով Սեդա Սաֆարյանի դեմ ծավալված արշավն անընդունելի է։ Դատավորի թիրախավորումը չի հերքում նրա բարձրացրած հարցերի հիմնավորված լինելը․ այն հարվածում է Սահմանադրական դատարանի անկախությանը, սահմանադրական արդարադատության հեղինակությանը և բացահայտում հենց թիրախավորողների իրավական ու քաղաքական խոցելիությունը։
Որպես Սահմանադրական դատարան դիմած քաղաքական ուժի ղեկավար՝ ինձ համար սկզբունքային է մեկ բան․ մենք չենք պահանջում մեզ հաճո արդարադատություն, մենք պահանջում ենք անկախ արդարադատություն։ Անկախ արդարադատություն հնարավոր է միայն, երբ դատավորն առանց ճնշման, սպառնալիքի և թիրախավորման իրականացնում է իր սահմանադրական առաքելությունը՝ առաջնորդվելով բացառապես Սահմանադրությամբ, իրավունքով և իր ներքին համոզմամբ։
Ժողովրդավարությունը պաշտպանում է այն Սահմանադրական դատարանը, որտեղ դատավորները ճնշումների առաջ չեն նահանջում, չեն ընկրկնում և Սահմանադրության անունից բարձրաձայնում են ամենաանհարմար հարցերը։
Հարգանքներս և շնորհակալություն դատավոր Սեդա Սաֆարյանին՝ անկախ դատավորի բարձր առաքելությանը հավատարիմ մնալու համար։
Հ․Գ․ Վերջին հինգ տարիներին Սեդա Սաֆարյանի հետ որևէ հանդիպում կամ շփում չեմ ունեցել։ Սա արձանագրում եմ՝ հնարավոր բոլոր շահարկումները բացառելու համար։
