Ծնեբեկի արտադրությամբ զբաղվող «Davtyan Farm» ընկերությունը ծնեբեկի առաջին խմբաքանակն է արտահանել Սինգապուր։ Այս մասին հաղորդագրություն է տարածել Հայաստանում Եվրամիության դեսպանատունը՝ հայտնելով, որ ԵՄ ֆինանսավորմամբ գործող «Դիմակայուն Սյունիք Թիմ Եվրոպա» նախաձեռնության ներքո իրականացվող «Սյունիքի վերականգնման, դիմակայունության և զարգացման» ծրագրի շրջանակում «Davtyan Farm» ընկերությունը հնարավորություն է ստացել իր արտադրանքը ներկայացնելու Սինգապուրում կայացած սննդի և խմիչքների միջազգային ցուցահանդեսում։
Նշվում է, որ ցուցահանդեսի ժամանակ ձեռք բերված կապերի շնորհիվ «Davtyan Farm»-ի օրգանական ծնեբեկի առաջին խմբաքանակն արդեն արտահանվել է, բացի այդ կազմակերպությունը նաև սկսել է հայկական ծիրանի փորձնական արտահանում։
«Davtyan Farm»-ը տարիներ է ներդրել Հայաստանի հարավում օրգանիկ ծնեբեկի արտադրությունը հիմնելու ու զարգացնելու համար՝ 2015 թվականից աջակցություն ստանալով ԵՄ-ից՝ նոր սարքավորումներից մինչև արտահանման հմտություններ։
«Սա գործնական օրինակ է, թե ինչպես է ԵՄ–ն աջակցում հայ արտադրողներին՝ ծնեբեկից մինչև ծիրանի արտահանում, օգնելով հասնել իրական ու նոր շուկաներ՝ տանից նույնիսկ հազարավոր կիլոմետրեր հեռու»,- ասված է հաղորդագրության մեջ։
