Հայաստանի ազգային հավաքականի նախկին ավագ, կիսապաշտպան Հենրիխ Մխիթարյանը ևս մեկ տարով երկարաձգել է պայմանագիրը Միլանի «Ինտերի» հետ։ Այս մասին պաշտոնապես հայտնել է իտալական ակումբը։
«Ինտերը» նշում է, որ հայ ֆուտբոլիստն իր փորձի, առաջնորդի հատկանիշների, հաղթողի մտածելակերպի, ինչպես նաև կիսապաշտպանությունում ցուցաբերած հանգստության ու խաղի նկատմամբ վերահսկողության շնորհիվ դարձել է թիմի առանցքային ֆուտբոլիստներից մեկը։
Ակումբի գնահատմամբ՝ Մխիթարյանն առաջին իսկ մրցաշրջանից աչքի է ընկել խաղի ընթացքը ճիշտ գնահատելու, անհրաժեշտ պահին տեմպը դանդաղեցնելու կամ արագացնելու ունակությամբ։ 2022/23 մրցաշրջանում նա անցկացրել է 49 հանդիպում, դարձել 5 գոլի և 2 գոլային փոխանցման հեղինակ՝ նպաստելով «Ինտերի»՝ Իտալիայի գավաթը և Սուպերգավաթը նվաճելուն, ինչպես նաև Չեմպիոնների լիգայի եզրափակիչ հասնելուն։ Այդ մրցաշրջանում նա նաև գոլի հեղինակ դարձավ «Միլանի» դեմ Չեմպիոնների լիգայի կիսաեզրափակչի առաջին խաղում։
2023/24 մրցաշրջանում Մխիթարյանը կրկին կարևոր դեր խաղաց թիմի հաջողություններում։ Նա դուբլ ձևակերպեց «Միլանի» դեմ 5:1 հաշվով հաղթանակում, իսկ ամբողջ մրցաշրջանի ընթացքում կատարեց անձնական լավագույն՝ 11 գոլային փոխանցումը և առաջին անգամ դարձավ Իտալիայի չեմպիոն։
2024/25 մրցաշրջանում հայ կիսապաշտպանը մասնակցել է 53 հանդիպման, ինչը նրա ամենաբարձր ցուցանիշն է «Ինտերի» կազմում։
Ավարտված՝ 2025/26 մրցաշրջանում Մխիթարյանը դաշտ է դուրս եկել 39 խաղում և խփել 4 գոլ։ Դրանց թվում էին կարևոր գոլերը «Լեչչեի» նկատմամբ արտագնա հաղթանակում և «Պարմայի» դեմ տնային խաղում, որտեղ նրա գոլը սկիզբ դրեց չեմպիոնության տոնակատարությանը «Սան Սիրոյում»։ Այդ մրցաշրջանում «Ինտերը» նվաճեց «դուբլը»՝ դառնալով և՛ Իտալիայի չեմպիոն, և՛ գավաթակիր։
Չորս մրցաշրջանների ընթացքում Մխիթարյանը «Ինտերի» կազմում անցկացրել է 187 հանդիպում, դարձել 12 գոլի և 21 գոլային փոխանցման հեղինակ՝ նվաճելով երկու Ա սերիայի տիտղոս, երկու Իտալիայի գավաթ և երկու Իտալիայի Սուպերգավաթ։
Այսպիսով, 2022 թվականի ամռանը մեկնարկած Մխիթարյանի ուղին «ներաձուրիների» կազմում կշարունակվի առնվազն մինչև 2027 թվականը։
