ԱՄՆ նախագահ Դոնալդ Թրամփը հայտարարել է, որ Վաշինգտոնի վարչակազմը թույլ չի տա, որ Պանամայի ջրանցքը հայտնվի Չինաստանի վերահսկողության տակ։
«Եվ հիմա Չինաստանը փորձում է վերահսկողություն հաստատել Պանամայի ջրանցքի նկատմամբ։ Մենք դա թույլ չենք տա», – ասել է նա Հյուսիսային Դակոտայում ունեցած ելույթի ժամանակ։ Նախագահը, խոսելով ջրանցքի մասին, ափսոսանքով նշել է, որ Միացյալ Նահանգները «այն նվիրել է» Պանամային։ «Եվ նրանք շատ փող են վաստակել։ Որքա՜ն հիմարություն էր դա։ Դա մեր կառուցած ամենաթանկ բանն է։ Եվ ամենաշահութաբերը», – ընդգծել է Թրամփը՝ նկատի ունենալով Պանամայի ջրանցքը։
Թրամփը բազմիցս հայտարարել է Պանամայի ջրանցքի նկատմամբ ԱՄՆ վերահսկողությունը վերականգնելու իր մտադրության մասին։ Նա Չինաստանի առևտրային ներկայությունը այս ռազմավարական ջրային ուղում անվանել է սպառնալիք ԱՄՆ անվտանգության և առևտրային շահերի համար։ 1914 թվականին բացված նավագնացության ջրանցքը կառուցվել և վերահսկվում է ԱՄՆ-ի կողմից։
1977 թվականին Տորիխոս-Կարտերի պայմանագիրը սահմանել է ջրանցքի փուլային փոխանցումը Պանամային՝ ավարտված 1999 թվականին։ Համաձայնագիրը նախատեսում էր ջրանցքի չեզոք կարգավիճակը և դրա հասանելիությունը համաշխարհային առևտրի օգտին։
