«Ստում են, ես Թուրքիայում համալսարան չեմ գնացել, չեմ սովորել, թուրքական դիպլոմ չունեմ»,- ասել է ԱԺ փոխնախագահ Ռուբեն Ռուբինյանը ճեպազրույցում։
«Ես իմ ուսանողական տարիները անցկացրել եմ սկզբից Հայաստանում՝ ԵՊՀ-ում սովորելու տարիներին՝ 2006-ից 2010 թվականներին, հետո Լոնդոնում, երբ որ մագիստրատուրա եմ ավարտել՝ 2010-ից 2011 թվականներին, հետո Լեհաստանում, որտեղ կրկին մագիստրատուրա եմ ավարտել՝ 2011-ից 2012 թվականներին», – նշել է նա և հավելել, որ չկա ինչ-որ մի մարդ, որ իրեն դաս է տվել Թուրքիայում։
Ռուբեն Ռուբինյանը շեշտել է, որ խոսքը 2016-ից 2017 թվականներին՝ 5 ամիս, մասնակցել է Հրանտ Դինքի հիմնադրամի ծրագրին․ «Հիշեցնեմ՝ ի՞նչ է Հրանտ Դինքի հիմնադրամը, կար հայազգի լրագրող՝ Թուրքիայում՝ Հրանտ Դինք, որին 2007 թվականին, եթե չեմ սխալվում, կամ 6, սպանեց թուրք ազգայնականը Ստամբուլի փողոցում։ Եվ կա հիմնադրամ՝ Հրանտ Դինքի անվան, որը ղեկավարում է Հրանտ Դինքի դուստրը։ Այդ հիմնադրամը ուներ ծրագիր, հայերենով, եթե չեմ սխալվում, այդ ծրագրի անվանումն էր «Սահմանից անդին», որը հնարավորություն էր տալիս հայաստանցիների և Թուրքիայի քաղաքացիների՝ համապատասխանաբար Թուրքիայում և Հայաստանում ինչ-որ ֆելոուշիփ անցնել» – ընդգծել է ԱԺ փոխնախագահը։
