Մինչ ՍԴ որոշման հրապարակումը «Ուժեղ Հայաստան» կուսակցության խորհրդի անդամ Նարեկ Կարապետյանն իրենց աջակիցների հետ որոշել է խոսել այն մասին, թե որն է իրենց ուժի հավատամքը, ինչի՞ համար է իրենց պայքարը։
«Մենք հավատում ենք, որ հայ ժողովուրդը սովորական, հերթական ժողովուրդը չէ, մենք հավատում ենք, որ աշխարհի 2 հազար ժողովուրդների մեջ հայ ժողովուրդն ընտրված ժողովուրդ է և ունի պատմական առաքելություն, դրա ապացույցը մենք տեսնում ենք կրոնական գրքերի մեջ»,-նշում է Նարեկ Կարապետյանը։
Նրա խոսքով, հայ ժողովրդի պարտությունների պատճառն այն է, որ նա խուսափում է իր ճակատագրից՝ ընտրելով հեշտ ճանապարհով գնալը։
«Աշխարհում կա ևս մեկ ազգ, որ պատմականորեն ընտրված է և ունի առաքելություն, ի տարբերություն մեզ, այդ ազգն ինքնակազմակերպման միջոցով իր առաքելությունն ընդունել է, չի խուսափել, այսօր էլ համարվում է աշխարհում տնտեսական կապիտալի 15 տոկոսի տերը և հզորագույն պետություններից մեկի ներկայացուցիչ, խոսքը հրեա ազգի մասին է»,-ասաց նա:
