ՀՀ-ում Իրանի դեսպան Խալիլ Շիրղոլամին ճեպազրույցում անդրադարձել է TRIPP-ի կառուցման վերաբերյալ Իրանի դիրքորոշմանը՝ հավելելով, որ այս ֆորմատով հայ-իրանական հարաբերությունների օրակարգային հարցերը պետք է լինեն, և դրանք են՝ այս նախագծից ի հայտ եկող ռիսկերի կառավարումը և հնարավոր մարտահրավերների վերացումը։
«Իրանի շատ լեգիտիմ և տրամաբանական անհանգստությունն իր սահմանների հարևանությամբ ամերիկացիների ներկայության վերաբերյալ պետք է հստակ արձագանք ստանա, և պատասխան տրվի այդ անհանգստություններին»,- ասել է նա և շեշտել, որ Հայաստանի Հանրապետության կառավարությունն էլ հավաստիացրել է, որ այս պրոեկտի իրականացման և ԱՄՆ-ի ներկայության արդյունքում որևէ սպառնալիք և մարտահրավեր Իրանի համար չի ստեղծվի։
«Կարծում եմ, որ մենք պետք է ձեռք բերենք այսպիսի մի մեխանիզմ, որի շրջանակներում Հայաստանի Հանրապետությունը կկարողանա իրացնել և իրականացնել ապաշրջափակման իր ամբողջ ներուժը, սակայն, ի լրումն դրա և դրա կողքին, պետք է կառավարվեն Ամերիկայի Միացյալ Նահանգների ներկայության հնարավոր ռիսկերը, և հստակ կերպով արձագանք տրվի դրանց»,- նշել է ՀՀ-ում Իրանի դեսպանը։
