Ադրբեջանն ու Հայաստանը տասնամյակներ տևած հակամարտությունից հետո գտնվում են «իրական խաղաղության» պայմաններում և ակտիվորեն վերականգնում են առևտրային կապերը։ Այնուամենայնիվ, Բաքուն շարունակում է պնդել, որ վերջնական խաղաղության պայմանագիրը ստորագրելու համար Հայաստանը պետք է փոփոխություններ կատարի իր սահմանադրության մեջ։
Ինչպես հաղորդում է Reuters-ը, խնդրահարույց կետը Հայաստանի սահմանադրության նախաբանն է, որտեղ հղում կա խորհրդային շրջանի այն փաստաթղթին, որով նախատեսվում է Հայաստանի և Լեռնային Ղարաբաղի վերամիավորումը։
Ադրբեջանի նախագահի օգնական Հիքմեթ Հաջիևը Շուշիում անցկացվող ֆորումի շրջանակներում պարբերականին տված հարցազրույցում ընդգծել է երկու երկրների միջև խաղաղության ուղղությամբ արձանագրված առաջընթացը՝ նշելով, որ այն արդեն իսկ իրականություն է, և ոչ թե լոկ թղթի վրա գրված հայտարարություն։
«Ադրբեջանն ու Հայաստանը գտնվում են իրական խաղաղության պայմաններում և վերականգնում են առևտրային կապերը տասնամյակներ տևած հակամարտությունից հետո։ Սակայն Բաքուն պնդում է, որ վերջնական համաձայնագրի ստորագրումից առաջ փոփոխություններ կատարվեն Հայաստանի սահմանադրության մեջ»,- ասել է Հաջիևը։
Ըստ նրա՝ սահմանադրության փոփոխությունները Հայաստանի ներքին գործն են։
«Սահմանադրական փոփոխությունների ձևը Հայաստանի ներքին գործն է։ Ադրբեջանի համար կարևոր է, որ այն դրույթները, որոնք մենք համարում ենք մեր երկրի նկատմամբ տարածքային պահանջներ, պաշտոնապես վերացվեն՝ լինի դա նոր Սահմանադրության ընդունման, թե այլ իրավական մեխանիզմի միջոցով։ Երբ այդ հարցը լուծվի, մենք կարծում ենք, որ վերջնական խաղաղության համաձայնագրի ստորագրման համար որևէ խոչընդոտ չի լինի»,- ընդգծել է նա։
