Ռուսաստանի և Ադրբեջանի արտգործնախարարներ Սերգեյ Լավրովը և Ջեյհուն Բայրամովը Մոսկվայում կայանալիք բանակցությունների ժամանակ քննարկում են տնտեսական, մշակութային և հումանիտար համագործակցությունը, Հարավային Կովկասում տիրող իրավիճակը և «3+3» հարթակը, ասել է ռուս նախարարը։
«Մենք անպայման կքննարկենք Հարավային Կովկասում տիրող իրավիճակը։ Մենք նշեցինք «3+3» տարածաշրջանային համագործակցության հարթակի (Ռուսաստանի, Ադրբեջանի, Հայաստանի, Իրանի, Թուրքիայի և Վրաստանի մասնակցությամբ խորհրդակցական տարածաշրջանային ձևաչափ – խմբ.) նկատմամբ վերականգնված և աճող հետաքրքրությունը», – նշել է նա։
Բայրամովի խոսքով էլ, բանակցությունների ընթացքում կողմերը մանրակրկիտ կքննարկեն առևտրատնտեսական համագործակցության հարցերը, որոնց հիմնական տարրերից մեկը միջկառավարական հանձնաժողովի կանոնավոր նիստերն են։
«Չնայած համաշխարհային տնտեսության մեջ առկա բոլոր դժվարություններին, մեր երկրների միջև ընդհանուր միտումը դրական է», – ընդգծել է Ջեյհուն Բայրամովը։
Նախորդ օրը Ռուսաստանի արտաքին գործերի նախարարությունը հայտարարել էր, որ Բայրամովի այցը դիտարկում է վստահության վրա հիմնված երկխոսության շարունակման համատեքստում և հաստատել է Մոսկվայի պատրաստակամությունը՝ նպաստելու Բաքվի և Երևանի միջև հարաբերությունների կարգավորմանը, ներառյալ խաղաղության պայմանագրի կնքումը, սահմանների սահմանազատումը և հաղորդակցությունների ապաշրջափակումը։
