Երևանի քաղաքապետարանի հուլիսի 20-ի գործակարգավարական խորհրդակցության նիստը սկսվեց Տիգրան Ավինյանի կողմից նորանշանակ պաշտոնյաների՝ Մալաթիա-Սեբաստիա վարչական շրջանի ղեկավար Սաշա Կատվալյանի և Շենգավիթ վարչական շրջանի ղեկավար Ռոմիկ Մխիթարյանի ներկայացմամբ: Ի թիվս այլնի, Երևանի քաղաքապետին զեկուցեցին, որ հաշվետու ժամանակահատվածում «Վեոլիա Ջուր» ընկերության թեժ գծի հեռախոսահամարին գրանցված և վերացված ջրագծի վթարների քանակը թվով 160 է: Գրանցված կոյուղագծի վթարների քանակը թվով 480 է, վերացված՝ 452, կատարողականը՝ 94%: Վթարավերականգնողական աշխատանքների ընթացքում քանդված բետոնյա ծածկույթի մակերեսը կազմել է 1146 քառակուսի մետր, վերականգնված է 16 քառակուսի մետր: Իրականացված վթարային ջրանջատումների քանակը թվով 34 է, հիմնանորոգված դիտահորի քանակը՝ թվով չորս, մաքրված անձրևատար դիտահորի քանակը՝ 182:
Նշվեց նաև, որ հուլիսի 3–17-ն ընկած ժամանակահատվածում Երևանի գազաֆիկացման և գազամատակարարման մասնաճյուղի սպասարկման տարածքում տեղի են ունեցել թվով 22 գազանջատումներ, որոնցից 6-ը՝ պլանային, 16-ը՝ վթարային: Տիգրան Ավինյանն ասաց, որ ուզում է Եղվարդի խճուղում տարվող աշխատանքների վերաբերյալ տեղեկատվություն ստանալ: «Եղվարդի խճուղում զուգահեռ 3 պրոյեկտ է իրականացվում, որոնցից առաջինը «Գազպրոմ Արմենիա»-ի կողմից է իրականացվում՝ գազաֆիկացման աշխատանքների, նոր խողովակաշարի անցկացման պրոցեսն է: Դրանից բացի, քաղաքապետարանի ծրագրով ոռոգման գծի անցկացման պրոցեսն է ընթանում, և մեկ պրոյեկտ կա մասնավորի կողմից՝ կոյուղատար համակարգի անցկացման պրոցես է իրականացվում: Երեք ուղղությամբ էլ վարչարարություն է իրականացվել, այս պահի դրությամբ արդեն աշխատանքներն ակտիվ կերպով շարունակվում են, որպեսզի ասֆալտբետոնյա ծածկույթը վերադառնա նախնական տեսքին»,- տեղեկացրին նրան:
Ավինյանը հիշեցրեց. «Այս տեսակ աշխատանքները, բացի նրանից, որ պետք է իրականացվեն ժամանակին, բոլոր շինարարական կանոնների պահպանմամբ՝ այն կանոնների, որոնք սահմանել է Երևան քաղաքի ավագանին: Եվ այստեղ ևս մի խնդիր արձանագրեմ. արդեն Շենգավիթ վարչական շրջանում՝ Գարեգին Նժդեհի պողոտայում, էլի բաց ավազը դրված է մայթերի կողքին, և դա անընդունելի է»: Նրան պարզաբանեցին, որ ընթացիկ շաբաթվա ընթացքում արդեն 18 արձանագրություն է կազմվել տարբեր շինարարական աշխատանքների ուղղությամբ, ամբողջ քաղաքով, բոլոր վարչական շրջանների կողմից իրականացվել են այդ արձանագրման և տուգանման պրոցեսները:
