Ամերիկյան զինվորականները նոր հարվածներ են հասցրել Իրանին՝ նպատակ ունենալով «էլ ավելի թուլացնել» Հորմուզի նեղուցում նավերի վրա հարձակվելու նրա կարողությունները:
Հարվածների այս շարքը, որն իրականացվում է արդեն տասներորդ գիշերն անընդմեջ, տևել է հինգ ժամ և հաջորդել է ԱՄՆ նախագահ Դոնալդ Թրամփի հայտարարությանը, որով նա մտադրություն էր հայտնել պատժել Իրանին անցյալ հանգստյան օրերին ամերիկացի զինվորների զոհվելու համար, ինչի դիմաց, ինչպես սպառնացել էր Թրամփը, Թեհրանը «բազմապատիկ կվճարի». «Ամեն անգամ, երբ Իրանը սպանում է ամերիկացի զինվորի, նա դրա համար բազմապատիկ կվճարի»,- Truth սոցիալական ցանցում գրել է Թրամփը։
«Ամերիկյան ուժերը հարվածներ են հասցրել իրանական ռազմական հրամանատարական կենտրոններին, ռազմածովային օբյեկտներին, հրթիռների և անօդաչու սարքերի արձակման հարթակներին, ինչպես նաև հակաօդային պաշտպանության (ՀՕՊ) համակարգերին, որպեսզի թուլացնեն Հորմուզի նեղուցով անցնող առևտրային նավերի վրա հարձակումները շարունակելու Իրանի կարողությունը:… Ամերիկյան ուժերը մնում են մարտական պատրաստության վիճակում և պատրաստ են Իրանին պատասխանատվության ենթարկել այն քաղաքացիական նավաստիների նկատմամբ անհիմն ագրեսիայի համար, ովքեր ձգտում են ազատ ու բաց անցնել նեղուցով»,- ասված է ԱՄՆ Կենտրոնական հրամանատարության (CENTCOM) հաղորդագրության մեջ:
