Նիկարագուայի երկարամյա նախագահ Դանիել Օրտեգան հայտարարել է, որ իրենց երկրում այլևս ընտրություններ չեն անցկացվի։ Սա բացառում է հաջորդ տարի նրա լիազորությունների ժամկետի ավարտից հետո ընտրությունների արդյունքները վիճարկելու հնարավորությունը և էլ ավելի է ամրապնդում այն իշխանությունը, որը նա կիսում է իր կնոջ հետ:
Օրտեգան, որ 2007 թվականից ի վեր անընդմեջ գտնվում է իշխանության ղեկին, հայտարարել է, որ այս քայլը կփակի ցանկացած ճանապարհ ընդդիմության համար, թեև արգելքի իրագործման վերաբերյալ մանրամասներ չի հայտնել:
«Այստեղ այլևս ոչ մի ընտրություն չի լինի, որպեսզի նրանք կարողանան փորձել զավթել իշխանությունն ու կառավարությունը»,- հայտարարել է Օրտեգան։
«Այն օրերը, երբ յանկիների (ԱՄՆ) և սոմոսականների կողմից աջակցվող կուսակցությունները վերադառնում էին իշխանության, անցել են. դա այլևս երբեք չի կրկնվի»,- հավելել է նա վերջին երկու ամսվա ընթացքում իր առաջին հանրային ելույթի ժամանակ:
ԱՄՆ Պետքարտուղարությունը դեռևս չի արձագանքել մեկնաբանություն տալու հարցմանը։ Թրամփի վարչակազմը Օրտեգայի կառավարությունն անվանել է բռնապետություն և պատժամիջոցներ սահմանել Նիկարագուայի ավելի քան 2350 պաշտոնյաների և նրանց հարազատների նկատմամբ:
Նիկարագուայում 2021 թվականի վերջին ընտրությունները լայնածավալ վեճերի տեղիք տվեցին այն բանից հետո, երբ Օրտեգան ձերբակալեց ընդդիմախոսներին ու բիզնեսի առաջնորդներին, ինչպես նաև քրեականացրեց այլախոհությունը:
Անցյալ տարի Օրտեգան էլ ավելի ամրապնդեց իր իշխանությունը մի շարք սահմանադրական բարեփոխումների միջոցով, այդ թվում՝ իր կնոջը՝ Ռոսարիո Մուրիլյոյին նշանակելով «համանախագահ» և նախագահական ժամկետը երկարաձգելով մինչև վեց տարի։
Նա և իր կինը վերահսկում են պետական կառավարման գրեթե բոլոր ոլորտները, ներառյալ զինված ուժերը և դատական համակարգը:
