Իսրայելական հետախուզությունը կարծում է, որ Իրանն անցյալ աշնանն իր ուրանի հարստացման հազարավոր ցենտրիֆուգներ է տեղափոխել Փիկաքս լեռան տակ գտնվող նոր ստորգետնյա համալիրի թունելներ, հաղորդում է The Wall Street Journal-ը՝ հղում անելով իսրայելցի և ամերիկացի պաշտոնյաներին։
Այս տեղեկատվությունը մեծացնում է Իսրայելի և ԱՄՆ-ի մտահոգությունները, որ Թեհրանը կարող է վերսկսել իր միջուկային ծրագիրը նոր վայրում, նշում է թերթը։
Թերթի աղբյուրների համաձայն՝ Իսրայելն այս հետախուզական տեղեկատվությունը փոխանցել է ԱՄՆ-ին՝ նշելով, որ ցենտրիֆուգները տեղափոխվել են Փիկաքս լեռան օբյեկտ 2025 թվականի հունիսի 12-օրյա պատերազմից հետո, երբ ԱՄՆ-ի և Իսրայելի ուժերը հարվածել են Իրանի երեք հիմնական միջուկային օբյեկտներին՝ Նաթանզում, Ֆորդոյում և Սպահանում։
Հետագայում ԱՄՆ նախագահ Դոնալդ Թրամփը սպառնացել է հարվածել Իրանի Փիկաքս լեռանը՝ ԱՄՆ-Իրան հակամարտության վերջին սրման ֆոնին։ Սպիտակ տան ղեկավարն այս հայտարարությունն արել է հուլիսի 13-ին լրագրող Հյու Հյուիթի հետ հարցազրույցում։
Փիկաքս լեռը գտնվում է Իրանի կենտրոնում՝ Նաթանզի ուրանի հարստացման գործարանից 1,5 կիլոմետր հեռավորության վրա, որը լրջորեն վնասվել էր 2025 թվականի ամռանը՝ ԱՄՆ-Իսրայելի ավիահարվածների հետևանքով։ Փիկաքս լեռան տակ գտնվող օբյեկտը, որի շինարարությունը սկսվել է 2020 թվականին, չի տուժել ռմբակոծությունից։
Հուլիսի սկզբին Վաշինգտոնում գտնվող Գիտության և միջազգային անվտանգության ինստիտուտը (ISIS)՝ նոր արբանյակային պատկերների վերլուծության հիման վրա, հայտնել է, որ համալիրի տարածքում շինարարական աշխատանքներ են ընթանում։
