Իրանի արտգործնախարար Աբբաս Արաղչին հարցազրույցում բացահայտել է պատերազմի առաջին օրվա սարսափելի մանրամասները՝ պատմելով այն պահի մասին, երբ հարվածի տակ է հայտնվել երկրի ռազմաքաղաքական ղեկավարության շենքը։
«Մոտավորապես երեք պայթյուն տեղի ունեցավ։ Առաջինն ուներ որոշակի հեռավորություն, բայց երկրորդն ու երրորդն արդեն անմիջապես մեր մոտակայքում էին։ Պատերը և շենքի բոլոր մասերը փլվեցին մեր գլխին։ Ես բռնեցի պաշտոնյաներից մեկի ձեռքը, և մենք հազիվ կարողացանք դուրս գալ ավերակների միջով՝ լսելով վիրավորների ճիչերը», — ասել է նա։
Արաղչիի խոսքով՝ շենքից դուրս գալուց հետո նրանք հայտնվել են փողոցում, որտեղ անցորդներից մեկը, առանց ճանաչելու, իր մեքենայով նրանց հասցրել է արտգործնախարարություն։
Անդրադառնալով հետագա օրերին և տարածաշրջանային երկրների հետ գաղտնի շփումներին՝ ԱԳ նախարարը պատմել է, որ պատերազմի առաջին օրերին կապ է հաստատել Ծոցի երկրների գործընկերների հետ և նախազգուշացրել․
«Մենք նախապես զգուշացրել էինք, որ եթե Իրանին հարվածեն, մենք թիրախավորելու ենք տարածաշրջանում գտնվող ամերիկյան ռազմական բազաները։ Դա ուղղված չէ տեղի երկրների դեմ, այլ նրանց հողում տեղակայված ամերիկյան ուժերի»։
Նա հավելել է, որ հետագայում որոշ երկրներ փորձել են սպառնալ կամ ժամանակավոր համաձայնությունների գալ, սակայն Իրանը հետևողականորեն իրականացրել է իր մշակված անվտանգային սցենարները՝ փոխելով տարածաշրջանային անվտանգության ողջ ճարտարապետությունը։
