ՌԴ ԱԳՆ-ն մանրամասներ է հայտնել Սերգեյ Լավրովի և Մարկո Ռուբիոյի հանդիպումից։
«Ի զարգացումն բարձրագույն մակարդակով վերջերս ունեցած շփումների՝ տեղի է ունեցել մտքերի հանգամանալից փոխանակում երկկողմ և միջազգային օրակարգի հարցերի լայն շրջանակի շուրջ:
Ուկրաինական հիմնախնդրի քննարկման ժամանակ Ս. Լավրովը ամերիկացի գործընկերոջն է փոխանցել տեղեկություններ մարտական շփման գծում տիրող իրական դրության մասին և շեշտել կիևյան ռեժիմին սպառազինություններով հետագա սնուցման անթույլատրելիությունը, ինչպես նաև ընդհանուր առմամբ եվրոպական երկրների ապակայունացնող քաղաքականությունը, որոնք մինչ օրս ձգտում են Ռուսաստանին «ռազմավարական պարտություն» հասցնել:
Ս. Լավրովը վերստին հաստատել է ռուսական կողմի պատրաստակամությունը հակամարտության քաղաքական-դիվանագիտական կարգավորմանը և հավատարմությունը այն առաջարկներին, որոնք ներկայացվել էին ամերիկյան կողմից Անկորիջում նախագահներ Վ. Պուտինի և Դ. Թրամփի հանդիպման ժամանակ, և որոնց ռուսական առաջնորդը տվել էր իր համաձայնությունը։
Անդրադարձ է կատարվել տարածաշրջանային և միջազգային հիմնախնդիրներին, այդ թվում՝ Պարսից ծոցում տիրող իրավիճակին:
Ս. Լավրովը և Մ. Ռուբիոն ողջունել են «Ռոսկոսմոս» պետական կորպորացիայի և ՆԱՍԱ-ի (NASA) միջև լիարժեք շփումների վերսկսումը, ինչպես նաև արտահայտվել են հօգուտ միջխորհրդարանական փոխանակումների և մշակույթի ոլորտում կապերի զարգացման:
Ուշադրություն է դարձվել նաև Ռուսաստանի և ԱՄՆ դիվանագիտական ներկայացուցչությունների գործունեության պայմանների նորմալացմանը:
Պայմանավորվածություն է ձեռք բերվել շարունակել շփումները արտաքին քաղաքական գերատեսչությունների գծով, այդ թվում՝ միջազգային կազմակերպությունների աշխատանքներին երկու երկրների մասնակցության շրջանակներում»:
