Telegram մեսենջերի հիմնադիր Պավել Դուրովի նկատմամբ միջազգային հետախուզում է հայտարարվել ահաբեկչությանը օժանդակելու գործով։ Այդ մասին հայտնում է Ռուսաստանի Անվտանգության դաշնային ծառայության Հասարակայնության հետ կապերի կենտրոնից։
«Նա հայտարարվում է միջազգային հետախուզման մեջ», — ասվում է հաղորդագրության մեջ։
Դուրովին մեղադրանք է առաջադրվել ահաբեկչական գործունեությանը օժանդակելու համար (ՌԴ Քրեական օրենսգրքի 205.1 հոդվածի 1.1-րդ մաս)։ Այդ հոդվածով նախատեսված պատիժը 7-ից 15 տարվա ազատազրկումն է։
ԱԴԾ-ում պարզաբանել են, որ Telegram-ի վարչակազմը չի հեռացրել այն ալիքները, խմբային զրույցներն ու բոտերը, որոնք, ըստ ծառայության, օգտագործվում են ուկրաինական հատուկ ծառայությունների, ինչպես նաև ահաբեկչական և ծայրահեղական կազմակերպությունների կողմից՝ Ռուսաստանում դիվերսիաներ, ահաբեկչական գործողություններ և զանգվածային սպանություններ իրականացնելու նպատակով։
