ԱԺ ընդդիմադիր պատգամավորների սեղաններից հանվել են Արցախի Հանրապետության դրոշները։ Այս մասին լրագրողների հետ զրույցում ասաց «Հայաստան» խմբակցության պատգամավոր Քրիստինե Վարդանյանը։ «Հայաստանում հիմա դրոշի դեմ պայքար է ընթանում։ Միայն մեր սեղաններից չէ, որ հանվել են, Ֆրանսիայի հրապարակից էլ է հանվել»,- ասաց նա՝ հավելելով, որ իրենց նախապես չեն զգուշացրել սեղաններից դրոշները հանելու մասին։
Քրիստինե Վարդանյանը չի կարծում, որ «դրոշամարտի» մեջ մտնելը ճիշտ ճանապարհ է. «Մենք դնենք, իրենք՝ հանեն, ու անլուրջ տպավորություն ստեղծվի։ Մենք պարզապես պետք է ստեղծենք այնպիսի երկիր, որտեղ Արցախի դրոշը խնդիր չլինի։ Չենք կարող բոլոր հրապարակներում հասցնել՝ դնել։ ՀՅԴ գրասենյակում, մեր աշխատասենյակներում Արցախի դրոշը դրված է, դա մեզ համար արժեք է։ Ամոթ է, որ Հայաստանում Արցախի դրոշը, հերոսների նկարները, հերոսների անկյունները կարող են խնդիր լինել։ Չենք կարող գնալ ԵՊՀ անցումի տակ ու Ռոբերտ Աբաջյանի նկարը վերականգնենք, բայց պիտի ստեղծենք այնպիսի պետություն, որ այդպիսի նկարները խնդիր չլինեն»։
