Ռուսաստանի և Հայաստանի միջև առևտրաշրջանառության 2/3-ով կրճատումը «Ուժեղ Հայաստան» կուսակցության առաջնորդ Սամվել Կարապետյանը համարում է Հայաստանի «անկարող կառավարության հաջողությունները»։
«Անպայման իրենք պետք է աղքատացնեն մեր գյուղացիներին»,-դատարանի բակում մինչ դատական նիստի մեկնարկը ասաց նա լրագրողների հետ զրույցում։
Ռուսաստանի փոխվարչապետ Ալեքսեյ Օվերչուկն այսօր հայտարարել էր՝ Ռուսաստանի և Հայաստանի միջև առևտրաշրջանառությունը կտրուկ նվազում է, 2026 թվականին այն նվազել է 2/3-ով՝ 2025-ի նույն ժամանակահատվածի համեմատ և կշարունակի նվազել։
Լրագրողները հետաքրքրվեցին նաև ԱԺ-ում հնչող այն հայտարարությունների մասին, ըստ որոնց ՀԷՑ հավելագրումներով փորձել են կտրել բանակի, մանկապարտեզների հացը։ Սամվել Կարապետյանն ասաց՝ ՔՊ-ականները ստիպված կրկնում են այն հայտարարությունները, որոնք անում է իրենց քաղաքական ղեկավարը։
«Արդեն 1 տարի 2 ամիս ՀԷՑ-ը կառավարում են, դրա վերաբերյալ չկա ոչ մի ապացույց։ ՀԷՑ-ը գործող մարմին է, այնտեղ մոտ 3 հազար մարդ հնարավորություն ունի այդպիսի ապօրինություններ անելու։ Հիմա Փաշինյանը մսխել է 8.5 մլրդ դոլար, հիմա ի՞նչ, կանգնենք ասենք, կերե՞լ է՝ չնայած, գուցե ինչ-որ մասից օգտվել է, բայց այդպիսի հայտարարություններն անպատասխանատու են, առավել ևս երբ իրենց կառավարած դատարանը հերքել է այդ ամեն ինչը»,-ասաց Կարապետյանը։
