«Նայեք հանձնաժողովի վերջին նիստերը, դրանց հաճախականությունը և կհասկանանք, թե այն երբ է պարապուրդի մատնված եղել»,- ԱԺ միջանցքում ասաց «Ուժեղ Հայաստան» խմբակցության ղեկավար Նարեկ Կարապետյանը՝ պատասխանելով հարցին, թե ինչու են ընտրել ԱԺ Եվրաինտեգրման հանձնաժողովի նախագահի պաշտոնը։
Նա նկատեց, որ վերջին 5 տարվա ընթացքում հանձնաժողովը գրեթե պարապուրդի է մատնված եղել, տարին 1-2 անգամ է հավաքվել։
«Մենք ակտիվացնելու ենք աշխատանքային պրոցեսը , մեր հանրությանն էլ ցույց ենք տալու, որ իրական դիվերսիֆիկացիա ենք ուզում բերել՝ Եվրոպայի հետ իրապես առևտրաշրջանառության աճ, եվրոպական ինստիտուտների տեղայնացում։ Ակտիվ աշխատացնելու ենք այն , որ ժողովուրդն էլ տեսնի, որ իրենց ասածը թե մենք միայն մի կողմի հետ հարաբերությունների լավարկման կողմնակիցն ենք, սխալ է։ Դուք տեսնելու եք, թե մենք ինչ տեմպերով ենք աշխատացնելու այդ հանձնաժողովը»,- ասաց Կարապետյանը շեշտելով որ Հայաստանը պետք է մի քանի գործընկեր ունենա, որ տնտեսությունը կայուն լինի։
Կարապետյանն ասաց, որ հանձնաժողովի նախագահի՝ «Ուժեղ Հայաստան» խմբակցության թեկնածուի անունը կհնչեցնեն վաղվա նիստում։
«Որ Եվրոպայի հետ նախ դատական համակարգի աշխատանքը լավանա, որպեսզի այս տխուր վիճակը չլինի, այլ ինստիտուտների հարցը առևտրաշրջանառությունը լավանա։ Մենք անունը դնում ենք, թե իբր երկիրը եվրոպամետ ուղղություն ունի, բայց առևտրաշրջանառությունը տասնյակ անգամ քիչ է քան ԵԱՏՄ-ի հետ, ինստիտուտների առումով էլ Եվրոպայի լավ ինստիտուտները չենք վերցնում, վերցնում ենք միայն անունը, բրենդը, մարկեթինգը, բայց չենք վերցնում կարևորը՝ դատական իշխանության ազատությունը, քաղաքացիական հասարակության պաշտպանությունը, որը Եվրոպան կարող էր տալ»,-հայտարարեց «Ուժեղ Հայաստան» խմբակցության ղեկավարը։
