ԱԺ «Քաղաքացիական պայմանագիր» խմբակցության պատգամավոր Արման Եղոյանը հակադարձել է այն տեսակետին, թե սփյուռքի ուժեղացումն ինքնաբերաբար նշանակում է նաև Հայաստանի հզորացում․
«Մի տարածված միֆ կա Հայաստանում․ ասում են՝ որքան ավելի ուժեղ է սփյուռքը, այնքան ավելի ուժեղ է Հայաստանը։ Սա կատարյալ սուտ է»,- ասել է Եղոյանը։
Նրա խոսքով՝ սփյուռքի թվային հզորացումը հնարավոր է հիմնականում Հայաստանից նոր արտագաղթի կամ այլ սփյուռքյան համայնքներից ներգաղթի հաշվին։
«Այն մարդիկ, որոնք ասում են, թե սփյուռքը պետք է հզորանա, դա նույնն է, ինչ ասեն՝ Հայաստանը պետք է թուլանա, որովհետև սփյուռքի հզորանալու ուրիշ ճանապարհ չկա»,- նշել է պատգամավորը։
Եղոյանի խոսքով՝ փոխարենը պետք է խրախուսել սփյուռքից մարդկանց տեղափոխուը Հայաստան․
«Սփյուռքից մարդիկ պետք է տեղափոխվեն Հայաստան, ինչի հետևանքով սփյուռքը կթուլանա, իսկ Հայաստանը կհզորանա։ Այլ ճանապարհ ուղղակի չկա»,- ասել է նա։
Անդրադառնալով «Հայաստան» խմբակցության այն դիտարկմանը, թե Հայաստանը սփյուռքի հետ միասին մեկ «քաշային կարգ» է, իսկ առանց սփյուռքի՝ մեկ այլ, Եղոյանը դա ևս «կատարյալ միֆ» է անվանել։
«Սփյուռքն ինքնին չունի հստակ քաշային կարգ։ Սփյուռքում չկա մեկ կենտրոն, ինչպես պետություններն ունեն՝ բյուջե, բանակ, տնտեսություն, մշտական բնակչություն և այլն»,- նշել է նա։
Եղոյանի խոսքով՝ տարբեր երկրներում գործող հայկական համայնքներն ու կազմակերպությունները հաճախ ունեն տարբեր, անգամ հակադիր քաղաքական դիրքորոշումներ։
«Սփյուռքը չունի մեկ հեռախոսահամար, որ զանգես, ինքը պատասխանի իր ամբողջ քաշային կարգով ու ասի՝ իմ քաշային կարգը միացնում եմ քո քաշային կարգին։ Ո՞վ է այդ հեռախոսահամարի տերը»,- ասել է պատգամավորը։
Ելույթի ավարտին Եղոյանը ներկայացրել է Հայաստանի և սփյուռքի հարաբերությունների իր պատկերացումը․
«Սփյուռքահայը երկու բան կարող է անել․ տեղափոխվել Հայաստան, ապրել այստեղ, աշխատել, ստեղծել արժեք, կամ, եթե ուզում է այնտեղից ինչ-որ բան անել, զանգել Հայաստան և հարցնել՝ ինչ կարող է անել այնտեղ։ Ուրիշ հարաբերություն չկա»,- եզրափակել է նա։
