Քաղաքական խոսքը չպետք է համապատասխանեցվի գործող իշխանության քմահաճույքներին. Մարուքյան

ԼՀԿ ղեկավար Էդմոն Մարուքյանի թելեգրամյան գրառումը․

«Ընդդիմադիր քաղաքական ուժի գործունեության հիմնական նպատակը պետք է լինի իշխանության հասնելը և սեփական ծրագրերն իրականացնելը։ Սա բնական ու օրինաչափ քաղաքական նպատակ է։ Սակայն ընտրություններից հետո ձևավորված նոր խորհրդարանում իշխանությունն ընդդիմությանն առաջարկել է մոռանալ անցած տարիների լարվածությունն ու «բարեկիրթ» աշխատել, իսկ ընդդիմադիր ուժերը, ըստ էության, ընդունել են այդ առաջարկը։

Նրանք պնդում են, թե բարեկիրթ ելույթներով և քաղաքակիրթ բանավեճերով հասնելու են իշխանափոխության։ Սակայն համաշխարհային քաղաքական փորձը ցույց է տալիս, որ միայն այդ ճանապարհով իշխանություն փոխել հնարավոր չէ։ Իշխանության ձգտող քաղաքական գործչի խոսքում, հայացքում և գործողություններում պետք է զգացվեն պայքարի կամքն ու իշխանությունը ստանձնելու վճռականությունը։

Հուսահատ հայացքով, զգուշավոր բառապաշարով և անձնական խնդիրներով ծանրաբեռնված քաղաքական գործիչն ի վիճակի չէ հասարակությանը պայքարի առաջնորդել։ Ժողովուրդն իշխանությունը կվստահի միայն նրան, ով իսկապես ցանկանում է և պատրաստ է այն վերցնել։

Քաղաքական խոսքը չպետք է սահմանափակվի, խմբագրվի և համապատասխանեցվի գործող իշխանության քմահաճույքներին։ Այն կարող է լինել սուր, հեգնական, պատկերավոր և կոշտ։ Հակառակ դեպքում խորհրդարանը կվերածվի ձևական քննարկումների հարթակի, որտեղ ընդդիմությունն օրինագծեր կներկայացնի, իսկ իշխանությունը դրանք կմերժի, և այդ ամենը որևէ քաղաքական կշիռ չի ունենա։

Եթե խորհրդարանական ընդդիմադիր ուժերի նպատակը պարզապես բարեկիրթ քննարկումներին մասնակցելն է, ապա թող ազնվորեն հայտարարեն այդ մասին»։