ԱԺ «Քաղաքացիական պայմանագիր» խմբակցության պատգամավոր Ռուզաննա Երեմյանն արձագանքել է դպրոցների օպտիմալացման վերաբերյալ մեղադրանքներին՝ նշելով, որ նախկինում կրթական համակարգում իրականացվել են վիճահարույց փոփոխություններ։
«Չմոռանա՛ք, որ 18 դասաժամ պարապող ուսուցչի մեկ դրույքը վերածեցիք 22 ժամի, դասարաններում աշակերտների քանակը մի հարվածով դարձրիք 35, իսկ հիմա եկել եք կրթական հանրությանն ասելու, որ մենք օպտիմալացում ենք անում»,- ասել է պատգամավորը։
Նա կոչ է արել ուշադրություն դարձնել նախկինում առկա խնդիրներին․
«Հասկանո՞ւմ եք՝ ինչ եք ասում։ Գյուղից մարդ կա՝ ամոթ է։ Գնացե՛ք ձեր նախարարների գողացած միլիոնների հետևից, և բավակա՛ն է, որ կրթության անունից խոսեն դիլետանտները»,- հայտարարել է նա։
Պատգամավորն անդրադարձել է նաև դպրոցաշինության թեմային՝ նշելով, որ իշխանություններին մեղադրում են դպրոցներ չկառուցելու մեջ։ Որպես օրինակ՝ նա առանձնացրել է Երևանի Հ․ Կոջոյանի անվան կրթահամալիրի շինարարությունը։
«Մեզ մեղադրում են դպրոցներ չկառուցելու մեջ։ Միայն Հակոբ Կոջոյանի անվան դպրոցի շինարարությունը տևեց հինգ տարի։ Ներողություն, տիկին Գալստյան, որ ձեր ժամանակների նման շենքերը չէին վաճառվում։ Հինգ տարի կառավարությունը հետևողականորեն գնաց նրան, որ այսօր Երևանի սրտում գործի մշակութային այդ կրթօջախը՝ այն չափանիշներով, որոնք ձեր ժամանակ պատկերացնել անգամ չէին կարող»,- նշել է Երեմյանը։
Երեմյանի խոսքով՝ վերջին տարիներին ավելացել է նաև կրթության ոլորտի ֆինանսավորումը։ Նա նշել է, որ ոլորտի ֆինանսավորումն ավելացել է 50,1 տոկոսով։
Պատգամավորը ներկայացրել է նաև 2026 թվականի հունիսի 30-ի դրությամբ դպրոցների և նախադպրոցական հաստատությունների շինարարության վերաբերյալ տվյալներ։
Նրա ներկայացրած տվյալներով՝ 2026 թվականի հունիսի 30-ի դրությամբ Հայաստանում ավարտվել են 172 դպրոցի և 332 մանկապարտեզի ու նախակրթարանի շինարարական աշխատանքները։ Դրանցից օգտվելու են համապատասխանաբար շուրջ 60 հազար աշակերտ և 29 հազար երեխա։
Միայն Երևանում վերանորոգվել է 15 դպրոց, 62 մանկապարտեզ։
Մարզերի կտրվածքով ներկայացված ցուցանիշները հետևյալն են․
Արագածոտնի մարզ՝ 9 դպրոց, 20 մանկապարտեզ
Արարատի մարզ՝ 13 դպրոց, 20 մանկապարտեզ
Արմավիրի մարզ՝ 17 դպրոց, 51 մանկապարտեզ
Գեղարքունիքի մարզ՝ 15 դպրոց, 33 մանկապարտեզ
Լոռու մարզ՝ 27 դպրոց, 24 մանկապարտեզ
Կոտայքի մարզ՝ 13 դպրոց, 24 մանկապարտեզ
Շիրակի մարզ՝ 35 դպրոց, 44 մանկապարտեզ
Սյունիքի մարզ՝ 13 դպրոց, 18 մանկապարտեզ
Վայոց ձորի մարզ՝ 7 դպրոց, 8 մանկապարտեզ
Տավուշի մարզ՝ 8 դպրոց, 28 մանկապարտեզ
Միաժամանակ, շինարարական աշխատանքների տարբեր փուլերում են գտնվում 543 նախադպրոցական հաստատություն՝ շուրջ 46 հազար երեխայի, և 375 ուսումնական հաստատություն՝ շուրջ 124 հազար սովորողի համար։
