ԱԺ ընդդիմադիր «Ուժեղ Հայաստան» և «Հայաստան» խմբակցության պատգամավորները նիստերի դահլիճում տեղի ունեցած միջադեպից հետո լքեցին նիստերի դահլիճը։
Հիշեցնենք, որ նիստերի դահլիճում լարված իրաիճակ էր ստեղծվել։ Նիստը նախագահող ԱԺ փոխխոսնակ Վահագն Ալեքսանյանը հայտարարեց՝ դիմելով «Ուժեղ Հայաստան» խմբակցության քարտուղար Տիգրան Աբրահամյան. «Ձեզ հայտարարվում է նախազգուշացում։… Դուք չեք կարող ինձ հայտարարել նախազգուշացում։ Պարոն Դավիթ Ղազինյան, ձեզ ևս հայտարարվում է նախազգուշացում»։
Ալեքսանյանը հայտարարեց, որ պատգամավոր Դավիթ Ղազինյանի նկատմամբ կիրառվում է կարգապահական տույժ, մեկ նիստում խոսափողից հանդես գալու իրավունքից զրկում։
«Հարգելի գործընկերներ, սա ձեր խմբակցության նիստը չի, ուրեմն ձեզ պահեք կարգուկանոնով։ Պարոն Ղազինյան, մի խոսեք այլևս տեղից»։
Պատգամավորները տեղից խոսում էին, որից հետո Վահագն Ալեքսանյանն ասաց. «Պատգամավոր Դավիթ Ղազինյանի նկատմամբ կիրառվում է կարգապահական պատասխանատվություն, հեռացում մինչև տվյալ օրվա ավարտը կայանալիք նիստերից՝ զրկելով այդ ընթացքում դահլիճում ներկա գտնվելու իրավունքից»։ Նա մի քանի անգամ կոչ արեց Դավիթ Ղազինյանին դուրս գալ նիստերի դահլիճից, և տեսնելով, որ դուրս չի գալիս, ներս հրավիրեց անվտանգության աշխատակիցներին՝ պատգամավորին դուրս հանելու համար:
