«Այո, մենք գնալու ենք Եվրամիություն»,- այսօր լրագրողների հետ ճեպազրույցում ասաց ՔՊ խբակցության պատգամավոր Արման Եղոյանը։ Հարցին, թե ի՞նչ գործնական քայլ են արել այդ ուղղությամբ, բացի նրանից, որ անդամակցության գործընթաց սկսելու մասին օրենք է ընդունվել ԱԺ կողմից, Արման Եղոյանը պատասխանեց․
«Օրենքը նախաձեռնվել է քաղաքացիների կողմից, եղել է նախաձեռնող խումբ, այստեղ չի գրվել այդ օրենքը։ Ինչ վերաբերում է ԵՄ հետ մեր հարաբերություններին, դուք չեք հերքի, չէ՞, որ անցած 7 տարիների ընթացքում Եվրամիության հետ մեր հարաբերություններն աննախադեպ խորացել են։ Ռազմավարական գործընկերություն է, Հայաստան ուղարկվեց ԵՄ դիտորդական առաքելությունը մեր պետության համար շատ ճակատագրական պահի։ Սրան ի պատասխան` մենք միացանք նաեւ ընդհանուր անվտանգային եւ արտաքին քաղաքականության առաքելություններին միանալու, մասնակցելու համաձայնագրին»,- ասաց Արման Եղոյանը։
ՔՊ-ական պատգանավորն ասաց, որ բազմաթիվ փոփոխություններ են տեղի ունեցել օրենսդրական եւ ենթաօրենսդրական մակարդակում, որոնք բխել են Հայաստան-Եվրամիություն համաձայնագրից։
«Հայաստանի Հանրապետությունում կյանքի որակը հիմա՞ է ավելի մոտ ԵՄ ստանդարտներին, թե՞ սրանից 10 տարի առաջ, ձեզ պարզ հարց։ Հիմա կյանքի որակն ավելի չի մոտեցե՞լ ԵՄ ստանդարտներին»,- հարցադրում արեց Եղոյանը:
