Ազգային ժողովի՝ օգոստոսի 20-ի նիստին ԱԺ փոխնախագահ Վահագն Ալեքսանյանն անդրադարձավ երեկ տեղի ունեցած միջադեպին:
«Կարևոր եմ համարում երեկ տեղի ունեցածի հետ կապված մի բան ասել: Առհասարակ ինքնահայեցումը քաղաքական գործչի համար կարևորագույն բաղադրիչ է, ու ես նորից նայել եմ մեր երեկվա նիստերը, լսել եմ ձեր հնչեցրած մտահոգությունները թե՛ դահլիճում, թե՛ դահլիճից դուրս, առնվազն դրանց տակ որոշակի լեգիտիմություն կար, ու դրանից որոշակի հետևություններ կանեմ: Բայց խնդրում եմ, որ ինքնահայեցումը փոխադարձ լինի, որովհետև վստահ եմ, որ եթե դուք էլ ձեր մասով նայեք, ձեր մասով դուք էլ ինքնահայեցման հարց կտեսնեք»,- ասաց նա՝ դիմելով ընդդիմադիրներին:
Վարման կարգով խոսք խնդրեց երեկվա միջադեպի մասնակից, «Ուժեղ Հայաստան» խմբակցության պատգամավոր Դավիթ Ղազինյանը՝ նշելով, որ որպեսզի նիստերը բնականոն ընթանան, և նմանատիպ միջադեպեր չլինեն, հորդոր ունի նախագահությանը, որ այն, ինչ հնչում է ամբիոնից, տարածվի բոլորի վրա:
«Որպեսզի տեղից մեր նյարդերն էլ տեղի չտան, և ընդհանրապես այս խնդիրները չլինեն, հորդորում եմ ընդամենըª նիստը կանոնակարգելու և վարելու հետ կապված նախագահությունն արձագանքի: Իմ հորդորը դա է, ու համոզված եմ՝ այսպիսի միջադեպեր չեն լինի»,- ասաց Դավիթ Ղազինյանը:
Վահագն Ալեքսանյանն արձագանքեց. «Ձեր միտքը լսելի է»:
Հիշեցնենք, որ երեկ Ազգային ժողովում եվրոպական ինտեգրման հարցերի մշտական հանձնաժողովի նախագահի թեկնածուի ընտրության շուրջ քննարկման ժամանակ ԱԺ փոխնախագահ Վահագն Ալեքսանյանի և ընդդիմադիր պատգամավորների միջև վեճ էր ծագել։ Ալեքսանյանը նախազգուշացումներ էր հայտարարել «Ուժեղ Հայաստան» խմբակցության պատգամավորներին՝ Տիգրան Աբրահամյանին և Դավիթ Ղազինյանին, ապա Ղազինյանի նկատմամբ կիրառել էր կարգապահական տույժ՝ զրկելով նրան նիստերին մասնակցելու իրավունքից։ Ղազինյանը լքել էր դահլիճը, որից հետո նրան հետևել էին նաև ընդդիմադիր խմբակցությունների պատգամավորները։
