ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է արտասահմանյան մամուլում շրջանառվող պնդումներին, թե Հայկական ԱԷԿ-ն աշխատում է հնացած տեխնոլոգիաներով և տարածաշրջանի անվտանգության համար սպառնալիք է։ Նա հիշեցրել է, որ կայանն ունի ամրության մեծ պաշար և հարմարեցված է բարձր սեյսմիկությանը, ինչն ապացուցվել է դեռևս Սպիտակի երկրաշարժի ժամանակ։
Զախարովան նշել է, որ ԱԷԿ-ի հուսալիությունը 2022 թվականին հաստատել է նաև ՄԱԳԱՏԷ-ի ղեկավար Ռաֆայել Գրոսին, իսկ հայ և ռուս մասնագետներն այժմ աշխատում են կայանի շահագործման ժամկետը մինչև 2036 թվականը երկարաձգելու վրա։ Ընդգծվել է նաև, որ կայանն ապահովում է Հայաստանի էլեկտրաէներգիայի պահանջարկի շուրջ 30%-ը, և դրա փակումը միայն կմեծացնի երկրի էներգետիկ կախվածությունը:
ՌԴ ԱԳՆ ներկայացուցիչը ռուս-հայկական նախագծի դեմ հնչող հայտարարությունները որակել է որպես երկկողմ համագործակցությունը պառակտելու փորձ։ Ըստ նրա՝ միջազգային որոշ դերակատարներ փորձում են տարածաշրջանում առաջ մղել իրենց ապակառուցողական և անվտանգությամբ զիջող տեխնոլոգիաները։
