ԼՀԿ նախագահ Էդմոն Մարուքյանը գրում է.
Սիրելի՛ հայրենակիցներ,
36 տարի առաջ այս օրը Գերագույն խորհուրդն ընդունեց Հայաստանի անկախության հռչակագիրը։
Սա, իրավամբ, Հայաստանի պատմության վերջին 600–700 տարիների ամենակարևոր փաստաթղթերից մեկն էր, որը հիմք դրեց անկախության վերականգնման գործընթացին։
Հայաստանի Առաջին Հանրապետության անկումից 70 տարի անց հայ ժողովուրդը վերստին ինքնուրույն որոշումներ կայացնելու և իր պետությունն ստեղծելու հնարավորություն էր ստանում։
Ասվածից հետևում է, որ Անկախության հռչակագիրը զուտ փաստաթուղթ չէ․ այն Հայաստանի Հանրապետության պետականության ծննդյան վկայականն է։ Հռչակագրում ամրագրված գաղափարներն ու սկզբունքները փոփոխման կամ վերանայման ենթակա չեն․ դրանք մշտապես ուղեկցել են և շարունակելու են իմաստավորել Հայաստանի Հանրապետության ու հայ ժողովրդի գոյությունը։
«Լուսավոր Հայաստան» կուսակցությունը և ես՝ որպես կուսակցության նախագահ, համոզված ենք, որ այս օրը Հայաստանի Հանրապետությունում պետք է նշվեր պետական ամենաբարձր մակարդակով։ Առնվազն պետք է կազմակերպվեին օրվա խորհուրդն ընդգծող միջոցառումներ։
Ինչևէ, այս բացառիկ տոնի առթիվ շնորհավորում եմ բոլորիս՝ թե՛ հայաստանցիներին, թե՛ աշխարհասփյուռ հայությանը։
Աստված պահապան Հայաստանի Հանրապետությանը։
