Բանակում մահվան դեպքեր եղել են մշտապես․ պետք է համակարգային մոտեցում․ Պապիկյան

Նախարար Սուրեն Պապիկյանը ճեպազրույցում անդրադարձել է բանակում վերջին շրջանում սպանությունների և ինքնասպանությունների դեպքերին․

«Ինտենսիվության հետ կապված չեմ կարող գնահատական տալ, թե որն է պատճառը, բայց այն, որ մահերի համար կարելի է մեղադրել նախարարին, նորություն է»,- ասել է նախարարը և հավելել, որ բանակի պատմությունը որոշակի վիճակագրություն է ենթադրում․ հայկական բանակի ողջ պատմության ընթացքում դեպքեր եղել են մշտապես․

«Օրինակ, 2025-ին մեր աշխատանքի արդյունքում այդ թիվը հասել է մինիմալի։ 2015-ին դեպքերի թիվը եղել է 7, բայց 2016-ին, հավանաբար՝ ապրիլյան պատերազմից հետո, թիվը դարձել է 19։ Նույն նախարարն է աշխատել և, վստահաբար, նույն հետևողականությամբ։ 2018 թվականին՝ 12, 2019-ին՝ 11, 2020-ին՝ 10, 2021-ին՝ 10, 2022-ին՝ 8, 2023-ին՝ 9, 2024-ին՝ 11, 2025-ին՝ 2 և 2026-ին՝ 8։ Ես խոսում եմ ինքնասպանության, սպանության դեպքերի մասին, չեմ խոսում այլ դեպքերի մասին»,- ընդգծել է պաշտպ․ նախարարը և հավելել, որ վերջին մեկ տասնամյակի ընթացքում այդ թվերը և՛ մեծացել են, և՛ պակասել։

Նրա խոսքով՝ դեպքերի մի մասը եղել են ոչ կանոնադրական հարաբերությունների արդյունքում, մի մասը քրեական ենթամշակույթի հետևանք են․ «Անկախ նրանից՝ նախարար կլինեմ ես, թե այլ մարդ, սրան պետք է համակարգային մոտեցում»,- շեշտել է Սուրեն Պապիկյանը։