ԱԺ նախագահ Ռուբեն Ռուբինյանը, խոսելով հայ-ռուսական հարաբերությունների մասին, ընդգծել է․ ոչինչ չի արվում, որպեսզի հարաբերությունները վատթարացվեն։
«Հակառակը՝ մենք ամեն ինչ արել ենք և շարունակում ենք անել նորմալ ու բարիդրացիական, բարեկամական հարաբերություններ ունենալու համար»,- ասել է ԱԺ նախագահը և հավելել, որ հայկական տնտեսվարողների դեմ կիրառվող անարդարացի և անտեղի սահմանափակումները չեն համապատասխանում ոչ Հայաստան-Ռուսաստան հարաբերությունների ոգուն, ոչ ԵԱՏՄ կանոններին։
Անդրադառնալով ԵՄ-ին անդամակցությանը՝ Ռուբինյանը նշել է, որ ԵՄ գործընկերներն են ջանում, որ Հայաստանը դիմի, անդամակցության քայլ անի․ «Նրանք ասում են անընդհատ, որ մենք պետք է հանրաքվե անցկացնենք, իսկ հանրաքվե անցկացնել հնարավոր է միայն այն դեպքում, երբ այդ հարցը ձևակերպված լինի, և այդ հարցից բխող հանգամանքները՝ հայտնի»,- ասել է նա։
«Մենք այսպես թե այնպես գիտեինք, որ Երևանն ազատ է իր ընտրության հարցում, և այսուհետ Երևանը միշտ ազատ է լինելու իր ընտրության իրականացման հարցում»,- ասել է ԱԺ նախագահ Ռուբեն Ռուբինյանը՝ անդրադառնալով ՌԴ նախագահի մամուլի քարտուղար Դմիտրի Պեսկովի հայտարարությանը, որտեղ նա նշել է, որ Հայաստանն ազատ է իր ընտրության հարցում։
