Պակիստանի մայրաքաղաք Իսլամաբադի խոշոր պետական հիվանդանոցներից մեկի նորածինների բաժանմունքում հրդեհ է բռնկվել, որի հետևանքով 14 երեխա մահացել է։ Հիվանդանոցի պաշտոնյաների տվյալներով՝ Պակիստանի բժշկական գիտությունների ինստիտուտի (PIMS) նորածինների բաժանմունքում հրդեհի պահին առնվազն 15 երեխա է եղել։ Մեկ նորածնի հաջողվել է փրկել։
Փրկարար ծառայությունների տվյալներով՝ հրդեհը բռնկվել է առավոտյան մոտ 06։45-ին՝ բաժանմունքում օդորակիչի կոմպրեսորի պայթյունից հետո։ Հրշեջները արագ ժամանել են դեպքի վայր և մարել կրակը։ Իսլամաբադի շրջանի մագիստրատը ստեղծել է միջգերատեսչական հանձնաժողով, որը 24 ժամվա ընթացքում պետք է ներկայացնի զեկույց։ Հանձնաժողովը պետք է պարզի հրդեհի առաջացման և տարածման պատճառները, ինչպես նաև գնահատի՝ արդյոք հիվանդանոցում ապահովված են եղել հրդեհային անվտանգության անհրաժեշտ միջոցները և պատշաճ կազմակերպվել է արտակարգ իրավիճակի արձագանքը։
Հիվանդանոցում ոստիկանություն է տեղակայվել։ Մահացած երեխաների ծնողներն ու հարազատները հավաքվել են հիվանդանոցում՝ պահանջելով պարզել հրդեհի պատճառները և պատասխանատվության ենթարկել մեղավորներին։
