Երևանի՝ Հավաքական անվտանգության պայմանագրի կազմակերպությունից (ՀԱՊԿ) դուրս գալու հարցում պետք չէ շտապել և առաջ ընկնել իրադարձություններից, քանի որ կա երկրի ղեկավարության կարծիքը, և կա հայ ժողովրդի կարծիքը։ Այս մասին ТАСС-ին տված հարցազրույցում հայտարարել է ՀԱՊԿ գլխավոր քարտուղար Թաալատբեկ Մասադիկովը։
Պատասխանելով այն հարցին, թե ինչ որոշում կարելի է ակնկալել Հայաստանի անդամակցության հարցով Հավաքական անվտանգության խորհրդի նոյեմբերյան նիստից՝ գլխավոր քարտուղարը նշել է, որ կազմակերպությունից «հեռացնելու կամ չհեռացնելու» որոշումները կայացնում են ՀԱՊԿ անդամ պետությունների ղեկավարները։ «Մենք՝ որպես քարտուղարություն, չենք կարող որոշում կայացնել այս կամ այն կողմի փոխարեն, ուստի ամեն ինչ դեռ առջևում է։ Արդյո՞ք այս հարցը լրջորեն կքննարկվի այս տարվա նոյեմբերին Մոսկվայում կայանալիք ՀԱԽ հերթական նիստում՝ նույնպես հարց է, դա որոշում են հենց պետությունների ղեկավարները։ Եկեք չշտապեցնենք [իրադարձությունները]»,- նշել է նա։
«Հայաստանի վարչապետ Նիկոլ Փաշինյանի հայտարարությունները մենք լսել ենք։ Ես միշտ ասել եմ, որ այս կամ այն հարցի վերաբերյալ կա ոչ միայն երկրի ղեկավարության կարծիքը, այլ նաև հայ ժողովրդի կարծիքը։ Ուստի եկեք առաջ չընկնենք իրադարձություններից»,- նշել է գործակալության զրուցակիցը։
