««Ռուսական երկաթուղիները» (ՌԵ) կատարում են Հայաստանի հետ կնքված կոնցեսիոն պայմանագրի բոլոր կետերը և բաց են տարբեր հարցերի ու առաջարկների շուրջ երկխոսության համար»:
Այս մասին «Իզվեստիա»-ին տված հարցազրույցում հայտարարել է ընկերության գլխավոր տնօրեն Օլեգ Բելոզյորովը:
Նա նշել է, որ ՌԵ-ն մշտական կապի մեջ է հայկական գործընկերների հետ և չափազանց պատասխանատու է վերաբերվում պայմանագրի բոլոր դրույթների կատարմանը:
Բելոզյորովի խոսքով՝ առաջանում են տարբեր հարցեր և առաջարկներ, որոնք համատեղ քննարկվում են, և դրանց վերաբերյալ նախանշվում են համապատասխան գործողություններ։
Հիշեցնենք՝ ավելի վաղ Նիկոլ Փաշինյանը հայտարարել էր, որ երկաթուղին Հայաստանի սեփականությունն է, ընդամենը գտնվում է ռուսական երկաթուղիների կառավարման ներքո»:
«Մենք հարգանքով ենք վերաբերվում ՌԴ-ին ու նրա շահերին, բայց Հայաստանի երկաթուղին ռուսական կառավարման ներքո լինելու պատճառով մենք հիմա կանգնած ենք Հայաստանը միջազգային երկաթուղային ցանցին ինտեգրելու պատմական այս հնարավորությունը կորցնելու վտանգի առաջ։
Մենք չենք կարող մեզ թույլ տալ կորցնել այդ պատմական հնարավորությունը։ ՌԴ մեր գործընկերներին խնդրում ենք ճկունություն ցուցաբերել և կոնցեսիայի իրավունքը վաճառել ՀՀ-ի և ՌԴ-ի համար ընդունելի երրորդ երկրի»,- ասել էր Նիկոլ Փաշինյանը:
Փաշինյանը հայտարարել է, որ կան մի քանի հնարավոր տարբերակներ՝ Ռուսաստանից ՀԿԵ-ի (Հարավկովկասյան երկաթուղու) կոնցեսիայի փոխանցման հարցը լուծելու համար:
