Մի քանի օր է՝ ինչ ակտիվորեն վերսկսվել է Իրան-ԱՄՆ ռազմական գործողությունների նոր փուլը։ ԱՄՆ զինված ուժերը կիրակի օրը հարվածել էին Իրանի Լարակ կղզում գտնվող երկու իրանական հրթիռային կայաններին, ինչը հուլիսից ի վեր ԱՄՆ-ի կողմից առաջին հարվածն էր Իրանին։ Reuters-ի փոխանցմամբ՝ այս մասին հայտնել էին ԱՄՆ պաշտոյաները։
Իրանի Իսլամական հեղափոխության պահապանների կորպուսը հայտարարել էր, որ հարձակման հետևանքով զոհվել և վիրավորվել են մի քանի զինվորներ և քաղաքացիներ, և որ Թեհրանը կպատասխանի դրան պատասխանով և պատժով։ Հարձակմանն ի պատասխան ԻՀՊԿ-ն հայտարարել էր, որ հարվածել է Հորդանանում գտնվող ամերիկյան ավիաբազաներին։ Իրանական հակահարվածներին ի պատասխան ԱՄՆ նախագահ Դոնալդ Թրամփը սպառնացել է հետագա հարվածներով։
«Մենք նրանց ուժեղ հարվածելու ենք», –Fox news-ը մեջբերել է Թրամփի խոսքերը, որը հետագայում հեռուստաալիքին ասել է՝ հակահարված կլինի։
Թրամփն Օվալաձև սենյակում լրագրողներին ասել է, որ վերսկսված հարվածները չեն նշանակում լիարժեք պատերազմի վերադարձ, Իրանին բնութագրելով որպես «ձախողված ազգ», որի տնտեսությունն ու զինված ուժերը լրջորեն քայքայվել են։
«Դա չի նշանակում, որ մենք նրանց չենք հարվածի։ Կտեսնենք, թե ինչ կլինի»,- ասել է Թրամփը։
Հարցին, արդյոք նա բացառել է Իրանի դեմ միջուկային զենքի կիրառումը, Թրամփը պատասխանել է, որ պատճառ չկա դա անելու, քանի որ Իրանն արդեն լիովին պարտված է ռազմական առումով։
Թրամփի հայտարարություններին հաջորդել է ԱՄՆ զինված ուժերի հարվածը Իրանի հարավային Հորմոզգան նահանգի Սիրիկ քաղաքում գտնվող բնակելի տան վրա, որի հետևանքով զոհվել կամ վիրավորվել էր մոտ 50 մարդ, այդ թվում՝ մեկ երեխա։
Հարվածներին ի պատասխան՝ Իսլամական հեղափոխության պահապանների կորպուսը հայտարարել է, որ իր ավիատիեզերական ուժերը հարվածել են Հորդանանի Աքաբայի ափին գտնվող ԱՄՆ ծովային հետևակի Քեմփ Թիբտին բազային։ «Մեհր» լրատվական գործակալության փոխանացմաբ՝ ԻՀՊԿ հայտարարության մեջ ասվում է, որ մեծ թվով ամերիկացի զինվորներ են զոհվել, և մի քանի կարևոր օբյեկտներ ու հարձակողական ուղղաթիռներ են ոչնչացվել:
ՄԱԿ-ում Իրանի դեսպանը Անվտանգության խորհրդին ուղղված նամակում դատապարտել է Լարակ կղզու վրա ԱՄՆ ռազմական հարձակումը՝ այն անվանելով Իրանի ինքնիշխանության և ՄԱԿ-ի կանոնադրության ակնհայտ խախտում։
