Ուկրաինայի նախագահ Վոլոդիմիր Զելենսկին հայտարարել է, որ Ռուսաստանի երկնքում անվտանգ վայրեր չեն մնացել: Ռուսաստանի նախագահ Վլադիմիր Պուտինը դա անվանել է «պետության կողմից հովանավորվող ահաբեկչություն»: Զելենսկին իր Telegram ալիքում ավիաընկերություններին նախազգուշացրել է, որ ռուսական երկինքը շատ վտանգավոր է դարձել ուկրաինական անօդաչու թռչող սարքերի պատճառով։
«Այսօր մենք ուզում ենք զգուշացնել Ռուսաստանի օդային տարածքն օգտագործող յուրաքանչյուր ավիաընկերության, յուրաքանչյուր ապահովագրողի, բոլոր նրանց, ովքեր շարունակում են օգտագործել Ռուսաստանի հիմնական օդանավակայանները՝ Ռուսաստանի երկինքը դառնում է լիովին վտանգավոր», – ասել է Զելենսկին։
Նա շեշտել է, որ Կիևը «որպես այդպիսին չի սպառնում քաղաքացիական ավիացիային»։
«Ռուսաստանի երկնքում պարզապես անօդաչու թռչող սարքեր կլինեն, և դա պետք է հաշվի առնել: Չնայած Ռուսաստանի իշխանությունները պատշաճ կերպով չեն հաղորդում այս մասին, սակայն Ռուսաստանի երկինքը փաստացի կփակվի. Ռուսաստանի կողմից սանձազերծված պատերազմը փակում է նրա երկինքը», – հավելել է նա։
Ուկրաինայի նախագահը նշել է, որ Ռուսաստանում աշխատող դեսպանները պետք է այս տեղեկատվությունը փոխանցեն իրենց երկրներին, իսկ ավիաընկերությունները, որոնք թռչում են Մոսկվայի, Սանկտ Պետերբուրգի և Ռուսաստանի այլ հիմնական ուղղություններով, պետք է լսեն այս նախազգուշացումը։
ՌԴ նախագահ Վլադիմիր Պուտինը մեկնաբանել է Զելենսկու հայտարարությունը Բիշքեկում կայացած Շանհայի համագործակցության կազմակերպության գագաթնաժողովից հետո լրագրողների հարցերին պատասխանելիս։
«Ես նման հայտարարություններ չեմ լսել, բայց եթե դրանք բարձրաձայն ասվում են, ապա դա պարզապես պետական ահաբեկչության մասին հայտարարություն է։ Եվ ես ուշադրություն եմ հրավիրում այն բանի վրա, որ նրանք մեզ խնդրում են վերսկսել բանակցությունները, խնդրում են անձնական հանդիպումներ: Ահաբեկիչների հետ բանակցություններ չեն լինի: Սա առաջին։ Եվ երկրորդ, նույն մասով՝ եթե, Աստված մի արասցե, նման ողբերգություններ տեղի ունենան, մենք կգտնենք արձագանքելու միջոց, թող ոչ ոք չկասկածի դրանում», – ասել է Պուտինը։ Հարցուպատասխանի սղագրությունը հրապարակել է Կրեմլի մամուլի ծառայությունը։
Ռուսաստանի և Ուկրաինայի միջև բանակցությունների մասին վերջին օրերին շատ է խոսվում՝ օգոստոսի վերջին ԱՄՆ Կենտրոնական հետախուզական վարչության ղեկավար Ջոն Ռեթքլիֆի՝ Մոսկվա այցից հետո։ Օգոստոսի 31-ին ԱՄՆ նախագահի բանագնացներ Սթիվ Ուիթքոֆը և Ջարեդ Քուշները հեռախոսազրույց են ունեցել Զելենսկու հետ։ Բացի այդ, նույն օրը Հյուսիսային Կարոլինայում Մեծ քսանյակի երկրների ֆինանսների նախարարների գագաթնաժողովի շրջանակում ԱՄՆ ֆինանսների նախարար Սքոթ Բեսենթը հանդիպել էր իր ռուսաստանցի գործընկեր Անտոն Սիլուանովի հետ։ Ըստ ամերիկյան կողմի՝ զրույցի գլխավոր թեման եղել է ռուս-ուկրաինական հակամարտության կարգավորումը։
