ԿԳՄՍ նախարար Ժաննա Անդրեասյանը, կառավարության նիստում անդրադառնալով ՀՀ-ի և Ասիական զարգացման բանկի միջև «Սեյսմիկ անվտանգության բարելավման երրորդ ծրագիր» վարկային համաձայնագրին, նշեց, որ նախագիծը կառավարության դպրոցաշինության ծրագրերի տրամաբանության մեջ է՝ ինչպես գործող 300, այնպես էլ հաջորդ 300 դպրոցի շրջանակում․
«Մեզ համար դպրոցաշինության ստանդարտի և ներկա ծրագրի իրականացման հարցում շատ կարևոր է եղել Ասիական զարգացման բանկի հետ սեյսմիկ անվտանգության ծրագրի շրջանակում մեր աշխատանքը»։
Նախարարն ընդգծեց, որ այս ծրագրի շրջանակում ստացել են դպրոցների տիպարային նախագծեր, որոնք հաջողությամբ սկսել են օգտագործել մյուս դպրոցների համար։
«Մենք արդեն 30 դպրոցում աշխատանքներն ավարտել ենք, մինչև տարեվերջ ևս 16 դպրոցում աշխատանքները կավարտվեն, և այս դպրոցները ներառված են 300 դպրոցի շրջանակում»։
Նախարարի խոսքով՝ ընդհանուր առմամբ խոսքը 366 մլն դոլարի մասին է, որի շրջանակում կառավարության կողմից համաֆինանսավորումը կկազմի 73 մլն դոլար, իսկ Ասիական զարգացման բանկի կողմից ֆինանսավորումը՝ 293 մլն դոլար։
