Իրանն առաջիկա օրերին կհայտարարի Հորմուզի նեղուցից դուրս նոր՝ սահմանափակ մուտքի գոտու մասին։ Այս մասին սեպտեմբերի 6-ին հայտարարել է Իրանի Գերագույն ազգային անվտանգության խորհրդի նորանշանակ ղեկավար Մոհսեն Ռեզային։
Ռեզայիի խոսքով՝ գոտին կսկսվի ԱՄՆ ռազմածովային ուժերի սահմանած շրջափակման գծից և կընդգրկի Պարսից ծոցի տարածքները։
Նա նախազգուշացրել է, որ նոր գոտի մուտք գործող ցանկացած նավ կներառվի պատժամիջոցների ցուցակում։
Ռեզային իր հայտարարությունն արել է Իրանի պետական հեռուստաընկերությանը՝ առանց նախաձեռնության այլ մանրամասներ ներկայացնելու։
Հայտարարությունից մեկ օր առաջ ԱՄՆ-ն հարվածներ էր հասցրել իրանական երեք նավթատարների՝ ի պատասխան Թեհրանի կողմից ամերիկյան ռազմանավերի ուղղությամբ բալիստիկ հրթիռների արձակման։ Փորձագետները հրթիռային հարվածներն անվանել էին վտանգավոր էսկալացիա, քանի որ Իրանի նախորդ հարձակումները ծովում հիմնականում ուղղված էին առևտրային նավերի դեմ։
Ռեզայիի խոսքով՝ նոր գոտու մասին նախատեսվում է հայտարարել առաջիկա օրերին։Իրանի և Միացյալ Նահանգների միջև զինված հակամարտությունը սկսվել էր փետրվարի 28-ին՝ ԱՄՆ-ի և Իսրայելի կողմից իրանական տարածքների դեմ սկսված հարվածներից հետո։
Հորմուզի նեղուցը Թեհրանի համար դարձել է պատերազմի ընթացքում ճնշման կարևոր գործիք։ԱՄՆ-ն հայտարարել է իրանական նավահանգիստների շրջափակման մասին, որի նկատակն է կանխել Իրանի նավթի արտահանումը։ Ամերիկյան կողմը դրա համար օգտագործում է 20 ռազմանավ։
ԱՄՆ-ի զինված ուժերի տվյալներով՝ սեպտեմբերի 6-ի դրությամբ շրջափակման արդյունքում ուղղությունը փոխել է 92 առևտրային նավ։
